25 maji bëhet Dita Botërore e Futbollit. Ky vendim u mor në mbledhjen e fundit të Asamblesë së Kombeve të Bashkuara. Sipas rezolutës, kjo ditë përkon edhe me 100 vjetorin e turneut të parë ndërkombëtar të futbollit në histori me përfaqësimin e të gjitha vendeve.
Tifozët e futbollit në mbarë botën tani kanë një ditë për të festuar sportin më të njohur në botë. Asambleja e Përgjithshme e Kombeve të Bashkuara ka miratuar një rezolutë që shpall 25 majin si Ditën Botërore të Futbollit.
Kjo ditë përkon edhe me 100 vjetorin e turneut të parë ndërkombëtar të futbollit në histori me përfaqësimin e të gjitha vendeve, i cili u zhvillua më 25 maj 1924 gjatë Lojërave Olimpike Verore në Paris.
Asambleja e Përgjithshme e OKB-së, e përbërë nga 193 anëtarë, miratoi rezolutën nën duartrokitjet e diplomatëve të pranishëm në dhomë. “Futbolli është loja më e luajtur dhe më e ndjekur në botë që luhet nga të gjitha moshat, në rrugë, fshatra, shkolla dhe oborre si për argëtim ashtu edhe për gara.
Futbolli shërben si një gjuhë universale duke kapërcyer barrierat kombëtare, kulturore dhe social-ekonomike dhe pranon se futbolli krijon një hapësirë për bashkëpunim”. Ajo njeh gjithashtu “rolin jetik” të organit qeverisës ndërkombëtar të futbollit, FIFA-s, federatave rajonale dhe kombëtare të futbollit, shoqatave përkatëse, në promovimin e lojës.
