MALME SUEDI
ZVICRA FITON “EUROVISION 2024” – GARA U SHOQËRUA ME PROTESTA!
Reperi zvicerian “Nemo” arriti që të thyente çdo pritshmëri duke rrëmbyer trofeun kryesor në Eurovizion 2024. Artisti zviceran kërkoi që ky festival të përcjellë vetëm një mesazh që është paqja. Gara e këtij viti u shoqërua edhe me protesta kundër Izraelit për shkak të fushatës së tij ushtarake në Gaza.
Zvicra u shpall fituese e Eurovision 2024 duke mposhtur Kroacinë nënkampione, pasi ishte në mesin e treshes për të fituar konkursin.
Reperi i quajtur Nemo me këngën e tij The Code arriti të mposhtte çdo pritshmëri dhe të rrëmbente trofeun.
Me një mesazh paqeje, artisti zviceran, i përlotur dhe i shtangur nga fitorja, foli për atë që do të dëshironte të ishte vijimësia e festivalit më të madh kontinental muzikor, ku nuk munguan aspektet kontroverse në tërësi.
“Thjesht të bëhesha pjesë e Eurovision ishte e veçantë. Nuk e dija që kjo këngë ka ndryshuar jetën time. Më duhet të them që e gjithë kjo përvojë ishte me të vërtetë intensive dhe e këndshme gjatë gjithë rrugës. Shpresoj që ky festival të shfaqë atë për çfarë shërben vërtetë: Paqen”, tha Nemo.
Baby Lasagna i Kroacisë, emri i vërtetë Marko Purisic, 28 vjeç, doli i dyti me këngën “Rim Tim Tagi Dim”. Nga ana tjetër, në vendin e tretë u radhit dyshja ukrainase, alyona alyona dhe Jerry Heil, me këngën e veçantë Teresa & Maria. Franca u rendit në vendin e katërt dhe Eden Golan i Izraelit, 20 vjeç, përfundoi i pesti në garë pavarësisht thirrjeve të demonstruesve për të bojkotuar festivalin.
Njëzet e pesë vende konkurruan në finale pasi artisti holandez Joost Klein u përjashtua për shkak se kërcënoi një punonjëse të produksionit ndërsa ajo po e filmonte pa leje. Televizioni publik holandez u shpreh i tronditur nga vendimi. Votat e publikut përbënin gjysmën e rezultatit përfundimtar, ndërsa juria prej pesë profesionistësh të muzikës përbënin gjysmën tjetër.
E cilësuar si një festë e mirë e diversitetit evropian, gara e këtij viti është vënë në qendër të vëmendjes politike me thirrjet për përjashtimin e Izraelit për shkak të fushatës së tij ushtarake në Gaza, të shkaktuar nga sulmi vdekjeprurës i Hamasit më 7 tetor në Izrael.
Ndërkaq para finales së Eurovizion një grup që protestonte kundër pjesëmarrjes së Izraelit në Eurovision Song Contest u rrethuan nga policia në Malmo. Mijëra njerëz protestuan në qytet duke hedhur një hije mbi finalen.
Organizatorët e Eurovizionit, të cilët gjithmonë e konsiderojnë ngjarjen vjetore si jopolitike, i kanë rezistuar thirrjeve për të përjashtuar Izraelin, por kërkuan që teksti i hyrjes së tij të ndryshohej për të hequr atë që organizatorët e quajtën referenca për sulmin vdekjeprurës të Hamasit më 7 tetor që shkaktoi luftën . Një turmë e madhe protestuesish u mblodhën në sheshin qendror të qytetit pritës suedez përpara se të marshonin drejt vendit ku do të mbahej konkursi, duke valëvitur flamujt palestinezë dhe duke thirrur “Eurovizioni i bashkuar nga gjenocidi”./tvklan.mk/
