“Tani nuk është koha për zgjedhje”, tha presidenti i Ukrainës, Volodymyr Zelenskyy të hënën, duke u përpjekur të pushojë një debat në rritje mbi këtë çështje mes pushtimit të ashpër të Rusisë.
Në fjalimin e tij të përditshëm, Zelenskyy tha: “Tani është koha për mbrojtje, për betejë, nga e cila varet fati i shtetit dhe popullit, dhe jo për farsë, të cilën vetëm Rusia e pret nga Ukraina. Mendoj se nuk është koha për zgjedhje”.
“Ne duhet të bashkohemi, të mos ndahemi, të mos shpërndahemi në grindje apo prioritete të tjera”, shtoi ai.
Të premten, ministri i jashtëm ukrainas, Dmytro Kuleba tha se presidenti ukrainas po “peshonte pro dhe kundër” të mbajtjes së zgjedhjeve, raporton Euronews, transmeton Klankosova.tv.
Megjithatë, Kievi tani gjendet në një dilemë. Aleatët perëndimorë, veçanërisht SHBA-ja, po i bën presion Ukrainës që të mbajë zgjedhje.
Ndërsa udhëheqësi i Republikës çeçene, Ramzan Kadyrov ka thënë se një “grup i madh” ish mercenarësh të Wagner po trajnojnë forcat e tij speciale AKHMAT.
Ai tha se AKHMAT, i konsideruar gjerësisht ushtria private e Kadyrov, do të “bashkohet nga luftëtarë që kanë përvojë të shkëlqyer luftarake dhe e kanë dëshmuar veten si luftëtarë të guximshëm dhe efikas”.
Mercenarët e Wagnerit luajtën një rol kyç në pushtimin rus të Ukrainës, veçanërisht në betejën e përgjakshme disamujore për Bakhmutin.
