Presidenti serb Aleksandar Vuçiç ka folur në telefon me Presidentin francez Emmanuel Macron, të shtunën, të cilit i ka kërkuar që “të bëjë përpjekje shtesë që pala prishtinase të vijë në vete dhe të kthehet në kornizën e bisedimeve konkrete”.
“Si gjithmonë një bisedë e hapur dhe serioze me presidentin Emmanuel Macron, të cilit i kam prezantuar pasojat e zhvillimit të rrezikshëm të situatës në Kosovë dhe Metohi”, ka shkruar Vuçiç në llogarinë e tij në Instagram.
“I kërkova presidentit Macron që të bëjë një përpjekje shtesë në mënyrë që pala prishtinase të vijë në vete dhe të kthehet sa më shpejt në kuadrin e bisedimeve konkrete”, ka shkruar Vuçiç.
Ai shtoi se falenderoi Macronin për gatishmërinë e tij për të dëgjuar Beogradin, si dhe për vendosmërinë e tij për të bërë përpjekje shtesë për të “zgjidhur situatën jashtëzakonisht komplekse dhe mbi të gjitha të rrezikshme në Kosovë dhe Metohi”.
Vuçiç ka bërë të ditur në Instagram se më 8 korrik ka folur në telefon edhe me shefin e diplomacisë italiane, Antonio Tajani. Ai e vlerësoi bisedën “konstruktive”.
“Ai (Tajani) kërkoi që Serbia të bëjë gjithçka për të ruajtur stabilitetin në rajon dhe theksoi se Italia është gjithmonë e gatshme të mbështesë paqen”, ka shkruar Vuçiç në llogarinë e tij në Instagram.
Vuçiç tha gjithashtu se gjatë bisedës ka falenderuar për “interesimin dhe mirëkuptimin” që kanë Italia, kryeministri Giorgia Meloni dhe Tajani për qëndrimet e Serbisë.
Bashkimi Evropian dhe Shtetet e Bashkuara të Amerikës po bëjnë përpjekje shtesë për të rikthyer në tryezën e bisedimeve liderët e Serbisë dhe Kosovës, me qëllim të de-përshkallëzimit të situatës në veri të Kosovës.
Javën e kaluar, i dërguari special i Bashkimit Evropian për dialogun ndërmjet Serbisë dhe Kosovës, Miroslav Lajçak, ishte në Beograd dhe Prishtinë.
Ai ka biseduar me presidentin e Serbisë, Aleksandar Vuçiç dhe kryeministrin e Kosovës, Albin Kurti.
Tensionet në veri të Kosovës, ku jetojnë shumica e serbëve, filluan kur kryetarët e rinj shqiptarë të komunave të Zveçanit, Zubin Potokut dhe Leposaviçit hynë në ndërtesat komunale me asistimin e policisë së Kosovës.
Serbët vendas e kundërshtuan këtë dhe që atëherë kanë mbajtur protesta, duke kërkuar tërheqjen e kryetarëve të rinj të komunave dhe njësive speciale të policisë së Kosovës./REL
