Më 1 shtator, sipas VMRO-DPMNE-së, një tjetër vit shkollor filloi në mënyrë katastrofike, përcjell KlanM.
Nga kjo parti akuzojnë se për më shumë se dy vjet, ende nuk është shtypur asnjë tekst shkollor për arsimin fillor, ndërsa për arsimin e mesëm profesional, siç thuhet në reagimin e VMRO-së, vet ministri ka pranuar se nuk kanë para.
“Një fiasko, pas së cilës çdo ministër në Evropë do të jepte dorëheqjen. Dhe ato materiale që do të përdorin nxënësit kanë gabime të papranueshme. Nëse vitin e kaluar qeveria Kovaçevski botoi libra shkollorë ku Shqipëria është fqinji ynë lindor dhe Bullgaria perëndimor, këtë vit lumenjtë Eufrat dhe Tigër ndodhen në Afrikë. Nuk do të na habiste nëse nesër Kovaçevski do të dilte duke akuzuar VMRO-në se është fajtore, apo ndoshta se ishte një sulm hibrid dhe çfarë jo, vetëm e vetëm që të mos pranojë paaftësinë e qeverisë së tij dhe të mos marrë përgjegjësi”, thonë nga VMRO.
Kaosin në arsim, sipas partisë së Mickoskit, e plotëson koncepti i ri me lëndë të kombinuara dhe modulare, në të cilat, siç thuhet, një mësues i kimisë jep edhe fizikë, ku tre mësues japin tre module në një lëndë, përcjell KlanM.
“Ky koncept, i cili u shpall në mënyrë spektakolare dhe u quajt modeli finlandez, tashmë njihet si një dështim. Dhe për këtë askush nuk dëshiron të pranojë se ka gabuar, se ka bërë dëm për mësuesit dhe fëmijët dhe për të gjithë procesin arsimor. Në këto 7 vite qeverisje të LSD-së dhe BDI-së, absolutisht nuk ka pasur sukses në arsim. Dhe ajo që tregojnë si rritje të pagave të pedagogëve nuk është as gjysma e rritjes së kostos së jetesës, që do të thotë se mësuesit sot jetojnë më të varfër se kurrë. Paaftësia dhe papërgjegjshmëria epike janë një nga shenjat kryesore të kësaj qeverie të BDI-së dhe LSD-së. Çdo gjë që kapën u tha e më shumë prej tyre ka vuajtur arsimi”, përfundon reagimi i VMRO-DPMNE-së./KlanMacedonia
