Bishtat e cigareve janë mbeturinat e dyta më të zakonshme që gjenden në plazhet europiane, sipas Organizatës Botërore të Shëndetësisë (OBSH). Vitin e kaluar, OBSH u bëri thirrje qeverive në mbarë botën që të konsiderojnë filtrat e cigareve si plastikë një-përdorimshe dhe t’i ndalojnë ato pasi dëmtojnë mjedisin dhe nuk kanë përfitime të vërtetuara shëndetësore.
Produktet e mbetura të duhanit lëshojnë 7,000 kimikate toksike, dhe bishtat përmbajnë mikroplastikë, të cilat dihet se janë të vështira për t’u prishur dhe për të ndotur natyrën. Disa vende europiane, përfshirë Holandën, tani po peshojnë një ndalim të filtrave të cigareve.
“Një ndalim i plotë i filtrave të cigareve njëpërdorimshe duket të jetë alternativa më efektive për të luftuar efektet e dëmshme mjedisore të këtij lloji të mbeturinave,” u tha ligjvënësve në prill ministrja holandeze e infrastrukturës Vivianne Heijnen. “Nuk ka përfitime të vërtetuara shëndetësore nga pirja e cigareve me filtër,” shtoi ajo.
Megjithatë, Heijnen tha se një ndalim kombëtar do të binte ndesh me marrëveshjen europiane të tregtisë së lirë dhe se në vend të kësaj duhet të merret parasysh rregullorja mbarë-Europe. Ajo sugjeroi se mund të përfshihet në rinovimin e vitit 2026 të udhëzimit evuopian për plastikën me përdorim të vetëm.
Gjithashtu muajin e kaluar, Këshilli Superior Shëndetësor në Belgjikë sugjeroi një ndalim mbarë-Europian të filtrave të cigareve. Në një raport, ai argumentoi se filtrat u ofrojnë duhanpirësve një “ndjesi më të këndshme në gojë” dhe u japin atyre një “ndjenjë të rreme sigurie”. Aktivistët e shëndetësisë në Danimarkë pajtohen dhe i janë bashkuar thirrjeve për ndalim.
Shoqata Daneze e Kancerit dhe Shoqata Daneze e Zemrës presin që cigaret pa filtra do t’i dekurajojnë të rinjtë nga pirja e duhanit.
Gjigandi i duhanit Philip Morris e ka hedhur poshtë idenë si “të pamend”. Politikanët në Danimarkë kanë sugjeruar gjithashtu legjislacion më të butë, siç është një taksë e re për filtrat e cigareve, e ngjashme me atë në letrën e cigareve.
Në Holandë, qeveria ka refuzuar megjithatë një sistem depozitimi të propozuar që do t’i shihte duhanpirësit të merrnin para për dorëzimin e bishtave të cigareve. Heijnen e quajti sistemin jopraktik dhe tha se adoleshentët mund ta shohin marrjen e bishtave të hedhur një mënyrë të lehtë për të fituar para.
Ndërsa aktivistët dhe politikanët imagjinojnë një të ardhme pa duhan, disa kompani tashmë po përgatiten për të. Lidl tani planifikon të heqë gradualisht shitjet e duhanit në të gjithë Danimarkën deri në vitin 2029, si pjesë e një bashkëpunimi me Shoqatën Daneze të Kancerit.
Duke filluar nga kjo verë, zinxhiri i dyqaneve ushqimore me zbritje do të heqë 20 për qind të cigareve nga raftet e tij dhe tashmë ka hapur një dyqan të ri pa duhan në Hjørring këtë javë.
/ SCAN
