Ku mbeti përgjegjësia për vdekjen e foshnjes 14-muajshe?
Ministri i Shëndetësisë, Arben Taravari, deklaroi publikisht se patjetër të ketë përgjegjësi për këtë rast tragjik, duke potencuar se rekomandimet për masat tashmë janë dërguar në Odën e Mjekëve.
Klan Maqedoni kontaktoi Odën e Mjekëve për të parë se deri ku dhe si qëndron procedura. Nga kjo Odë u përgjigjën se, se për shkak të disa mungesave të mjekëve, Procedura për rastin e vdekjes së foshnjës 14 muajshe pritet që të përfundojë gjatë javës së ardhshme.
ODA E MJEKËVE
“Në lidhje me rastin që ju intereson, deri më tani në Odën e Mjekëve janë zhvilluar disa takime me anëtarë të organeve të ndryshme. Duke qenë se një pjesë e mjekëve anëtarë të organeve nuk ndodhen në vend këtë javë, presim që e gjithë procedura të përfundojë gjatë javës së ardhshme”.
Foshnja 14 muajshe ndërroi jetë më 5 tetor në Klinikën për Sëmundje të Fëmijëve, pasi prindërit me ditë të tëra kishin kërkuar ndihmë nga njëra në klinikën tjetër.
Komisioni I Ministrisë së Shëndetësisë konstatoi se në Klinikën për Sëmundje të Fëmijëve janë bërë lëshime në vlerësimin për nevojën e hospitalizimit, kurse në Spitalin e Kozles ka patur vlerësim joadekuat të vështirësive respiratore.
Kujtojmë që familjarët e foshnjës kërkuan dorëheqjen e Ministrit Taravari dhe Drejtorit të Klinikës për fëmijë, Rexhep Memedi. /tvklan.mk/
