Parku i Gazi Babës sot shndërrohet në një qendër të fuqizimit dhe shëndetit për gratë dhe vajzat e reja me mbajtjen e festivalit të parë “Unë jam…”. Organizuar nga Shoqata Qytetare “Të rinjtë munden”., ky festival synon të nxisë përgjegjësinë ndaj shëndetit fizik dhe mendor përmes një qasjeje të informuar dhe holistike ndaj jetesës.
Festivali do të ofrojë një gamë të gjerë aktivitetesh dhe punëtorish interaktive që mbulojnë tema nga menaxhimi i stresit dhe kujdesi personal deri te ushqyerja e shëndetshme dhe fitnesi. Vizitorët do të kenë mundësi të eksplorojnë zona të ndryshme, duke përfshirë një zonë të shëndetit mendor me seminare dhe një labirint mendor, një zonë të kujdesit të trupit me këshilla për produktet shtëpiake dhe organike të kozmetikës, si dhe një zonë të ushqimit të shëndetshëm me këshilla nga nutricionistët.
Për më tepër, një zonë fitnesi do të ofrojë aktivitete si yoga në natyrë dhe seminare për vetëmbrojtje, ndërsa fëmijët do të kenë mundësi të marrin pjesë në seminare për shëndetin dhe zhvillimin motorik. Një garë rekreative për prindër dhe fëmijë dhe një performancë stand-up do të theksojnë rëndësinë e rolit të gruas në shoqëri, duke e bërë këtë ngjarje një festë të vërtetë të shëndetit dhe mirëqenies.
