Gazetari i Klan News Besar Bajraktaraj ka siguruar një foto aktuale të Lulzim Berishës. Ky i fundit u arrestua ditën e sotme pas 3 vitesh në arrati.
Në foton e siguruar, shihet qartë një ndryshim i madh në pamjen e tij.
Kujtojmë se Berisha u prangos këtë të Enjte në Spanjë dhe njihet ndryshe si ish-kreu i bandës së Durrësit. Ndaj tij rëndojnë një sërë akuzash.
Konkretisht në 2012 ai u dënua me burg përjetë nga Gjykata e Durrësit për disa krime të rënda, dënim ky që u rrëzua në Korrik të 2014 nga Gjykata e Lartë.
Kjo e fundit e dënoi atë përfundimisht me 25 vjet burg, por vetëm dy vite pas këtij dënimi ai u lirua nga burgu, konkretisht në Dhjetor të 2016.
Katër vite pasi fitoi lirinë, ndaj Lulzim Berishës nis një tjetër proces penal, ku u shpall sërish në kërkim nga drejtësia. Për të SPAK ngre akuzën e pjesmarrjes në vrasjen e Klodian Saliut, Vajdin Lames dhe mikut të tij Artan Arsi, ngjarje këto të ndodhura në vitin 2005.
Sikur të mos mjaftonin këto, në vitin 2021, Gjykata e Lartë rrëzoi vendimin për lirimin e Lulzim Berishës në 2016 dhe kërkoi rikthimin e tij në burg.
Kërkesë kjo e cila pritet të realizohet vetëm pas përmbylljes së procesit të ekstradimit të tij në Shqipëri, pas arrestimit./tvklan.al
