Vendimi i fundit i kryesisë së partisë politike Aleanca për Shqiptarët është të kandidojë i pavarur në zgjedhjet e ardhshme, deklaroi sot lideri i ASH-së, Arben Taravari, në pyetjen e një gazetari për ofertën e Ali Ahmetit që Aleanca dhe BDI të dalin me lista të përbashkëta në zgjedhjet e ardhshme.
“Për momentin, vendimi i fundit i kryesisë së partisë është të shkojmë në zgjedhje në mënyrë të pavarur. Por, ky vendim duhet të kalojë edhe në Kuvendin Qendror që do të mbahet deri në fund të këtij viti, diku në dhjetor. Definitivisht, Aleanca për Shqiptarët nuk do të shkojë me BDI-në me lista të përbashkëta dhe këtë ia kam përsëritur Ahmetit në mbledhjen e fundit. Përgatitemi për një performancë të pavarur dhe po mobilizojmë anëtarësinë. Ky është qëndrimi im dhe i kryesisë dhe nëse do të ndryshojë do të bëhet e qartë pas një seance të organit më të lartë të partisë”, tha Arben Taravari.
