Kreu i opozitës LSDM ka shtrirë dorën për takim mes liderëve të partive politike, respektivisht me kryeministrin, pas ngjarjes në Koçan. Filipçe thotë se qytetarët meritojnë më mirë dhe se është e qartë se sistemi nuk funksionon në disa segmente dhe ai ka dështuar.
Filipçe ka sqaruar para mediave edhe disa nga pikat që do të diskutoheshin në takim me kryeministrin dhe liderët e partive të tjera.Sipas tij, partitë, qoftë LSDM-ja, qoftë VMRO-ja, BDI-ja, por edhe cila do qoftë parti, nuk arritën të sjellin më të mirën për qytetarët në shëndetësi, arsim, po edhe në disa sfera të tjera të jetës.
VENKO FILIPÇE – KRYETAR I LSDM-SË
“Është mirë për këto tema të ulen dhe të diskutojnë liderët e partive politike parlamentare. I pashë qëndrimet e pashë qëndrimin edhe të kryeministrit. Në këtë takim do të zbuloj planin për të cilin fola, po edhe më tepër në takimin eventual në ditët në vijim. Shpresoj se pas kësaj që fola tani, në këtë do të përfshihen edhe partitë e tjera politike, sepse ka kaluar shumë kohë që ne të flasim se diçka duhet ndryshuar. E pamë që tragjedia në Koçan nxorri në pah shumë probleme sistematike.”
Kryeministri pranon të takohet me Filipçen dhe thotë se koha është për vendime serioze dhe sipas tij, nëse Filipçe dëshiron, ai është i gatshëm ta takojë atë edhe në mesnatë. Sipas kryeministrit, për tema të tilla është e pahijshme të diskutohet përmes mediumeve.
HRISTIJAN MICKOSKI – KRYEMINISTËR
“Unë e thashë, nëse kanë një plan, siç paralajmëruan, jam i gatshëm ta pranoj në takim kreun e LSDM-së që ai ta zbulojë dhe sqarojë planin dhe ne ta dëgjojmë planin, sepse koha është serioze. Unë jam njeri serioz dhe në pyetje janë punë serioze dhe më së paku që duhet të bëhet është ‘estradë’ në skenë të hapur. Nëse vërtetë ka dëshirë dhe plan për të ndihmuar, jam në dispozicion, do ta ndryshoj edhe orarin tim, kur do që ai dëshiron takim, në mesnatë, qoftë pas mesnate, kurdo që thotë ai, unë do ta dëgjoj planin e tij.”
Kërkesa e Filipçes për takim liderësh është diskutuar edhe një javë më parë. Bashkimi Demokratik për Integrim vlerëson se para takimit të liderëve duhet të merren masat institucionale për drejtësi dhe të plotësohen disa nga kërkesat e tyre që pastaj të ulen në tavolinë për të diskutuar. Në të kundërtën, sipas tyre, është i panevojshëm një takim i tillë. /tvklan.mk/
