Skena e sulmit me bombë në qendër të Stambollit
Policia turke ka shpërndarë pamjet që tregojnë momentet se si Ahlam Albashir mbërriti dhe u largua nga vendi i ngjarjes pak para se të ndodhte shpërthimi që la 6 të vdekur dhe 81 të plagosur në qëndër të Stambollit.
Tronditja tek qytetarët ende nuk ka kaluar edhe tre ditë pas shpërthimit të madh që ndodhi mesditën e së dielës në zemër të Stambollit.
Për shpërthimin në rrugën Istiklal fajësohet një grua, e cila, sipas autoriteteve turke, rrëfeu se ishte trajnuar nga Partia e Punëtorëve të Kurdistanit .
Ahlam Albasir , e cila akuzohet për tragjedinë në një nga pikat më turistike të Stambollit, i kishte menduar mjaft mirë lëvizjet që do të kryente.
Kamerat e sigurisë nga zona e kanë kapur autoren e dyshuar të ulur për një kohë të gjatë në stolat përreth vendit ku ndodhi shpërthimi.
Sic mund të shihet edhe nga këto pamje Albasir la çantën e shpinës në stol ku ndodhej lënda plasëse në orën 16:11 me orën lokale dhe filloi të ecë përsëri drejt sheshit Taksim . Më pas nisi të vraponte pas orës 16:14, në momentin edhe kur ndodhi shpërthimi.
Gjashtë persona, përfshirë një fëmijë 9-vjeç, humbën jetën dhe dhjetëra u plagosën në bombardimin e së dielës.
Në pyetje nga policia turke janë marrë 50 persona, mes tyre edhe autorja, e cili u arrestua 10 orë pas sulmit terrorist.Shtetasit sirianë që ndihmuan gruan, por edhe ajo vetë, tani janë në paraburgim.
Përgatiti: Xhuana Lika
