Ministria libaneze e Shëndetësisë raportoi se të paktën 60 persona janë vrarë si pasojë e sulmeve izraelite në luginën lindore Bekka të Libanit. Sipas zyrtarëve, 2 fëmijë ishin në mesin e atyre që u vranë në sulmet që synuan 16 zona në rajonin e Baalbek.
Guvernatori i Baalbek, Bachie Khodr i quajti sulmet më të dhunshmet në këtë zonë që kur Izraeli përshkallëzoi konfliktin kundër Hezbollahut muajin e kaluar.
Ndërkohë, ushtria izraelite nuk ka komentuar ende në lidhje me ngjarjen. Në 5 javët e fundit, Izraeli ka kryer mijëra sulme ajrore në të gjithë Libanin pasi thotë se synon infrastrukturën dhe armët e Hezbollahut.
Më herët gjatë së hënës, Ministria e Shëndetësisë e Libanit tha se sulmet ajrore izraelite në qytetin bregdetar të Tirit lanë 7 të vdekur dhe 17 të plagosur. Nga ana tjetër, Izraeli lëshoi një paralajmërim për njerëzit që të largohen nga qendra e qytetit.
Hezbollahu tha se u përlesh me trupat izraelite pranë kufirit jugor të Libanit të hënën dhe qëlloi me raketa një bazë detare brenda Izraelit pranë Haifës.
Sjellim në vëmendje se armiqësitë ndërkufitare midis Izraelit dhe Hezbollahut shpërthyen pasi grupi libanez filloi të gjuante raketa në dhe rreth Izraelit verior në mbështetje të palestinezëve më 8 Tetor 2023, pas sulmit të aleatit të tij Hamas në Izraelin jugor./tvklan.al
