Shirat e dendur në Spanjë kanë bërë qe autoritetet spanjolle të mbyllin shkollat, universitetet dhe kopshtet si një masë paraprake. Reshjet e shiut goditën bregdetin juglindor të vendit pas një thatësirë të gjatë, duke shkaktuar përmbytje të mëdha.
Reshjet e mëdha pritet të vazhdojnë edhe për pjesën tjetër të ditës në zonat më të goditura, duke përfshirë pjesë të rajoneve të Murcias, Valencias dhe Andaluzisë.
Disa vende në rajonin e Valencias kishte më shumë shi në pak ditë sesa në gjashtë muajt e fundit së bashku, njoftoi agjencia kombëtare e motit AEMET.
Me 130 litra për metër katror, qyteti i Ontinyent në rajonin e Valencias pati një sasi rekord reshjesh në një ditë në maj krahasuar me 100 vitet e fundit, shtoi agjencia.
“Shiu mund të ndihmojë në lehtësimin e efekteve të një thatësire të zgjatur në Spanjë, e cila ishte në rrugën e duhur për ta bërë këtë pranverë më të thatën e regjistruar që nga viti 1961”, tha zëdhënësi i AEMET, Ruben del Campo.
Pavarësisht reshjeve, ai shtoi se kjo pranverë pritet të jetë ndër më të thatat e regjistruara ndonjëherë.
“Reshjet në të gjithë vendin nga tetori 2022 deri më 21 maj të këtij viti, ishin 28 për qind nën mesataren për atë periudhë”, tha Del Campo.
