Me moton “KTHEMA ADRESËN”, qytetarë të shumtë të pasivizuar të Medvegjës iu përgjigjën pozitivisht protestës së organizuar nga Këshilli Nacional Shqiptar.
Protesta u mbajt para stacionit policor të Medvegjës, ku pjesëmarrësve iu drejtuan me fjalë rasti z. Nevzad Lutfiu, Kryetari i Këshillit Nacional, dhe Shaip Kamberi, deputet në Kuvendin e Serbisë.
Në protestë morën pjesë gjithashtu kryetarja e Komunës së Preshevës, Ardita Sinani, këshilltari i zëvendëskryeministrit të Kosovës, z. Ragmi Mustafi, tre asamblistë shqiptarë të Kuvendit Komunal të Medvegjës dhe përfaqësues të jetës politike dhe shoqërore.
Në protestat e mbajtura, fillimisht në Bujanoc, e më pas në Preshevë, u bë thirrje për njohje të diplomave të Kosovës, për integrim nëpër institucionet shtetërore të Serbisë, për lejim të përdorimit të simboleve kombëtare shqiptare dhe për zgjidhjen e çështjes së pasivizimit të adresave.
