Përvoja e imunologes virale kroate, Dr. Beate Halassa, e publikuar në revistën Vaccines, u raportua nga media të shumta botërore si historia e një shkencëtareje e cila trajtoi me sukses kancerin e saj të gjirit duke injektuar viruse të rritura në laborator
Shkencëtarja 50-vjeçare, Beata Halassy, trajtoi kancerin e saj të gjirit të fazës së 3-të duke injektuar në tumorin e saj viruse të rritura në laborator. Virologia nga Universiteti i Zagrebit, Kroaci, zbuloi kancerin e saj të gjirit në vitin 2020, në të njëjtin vend ku i ishte nënshtruar një mastektomie të mëparshme.
Meqenëse kjo ishte një përsëritje e kancerit, ajo kërkoi ta trajtonte vetë sepse nuk mund të përballej me një periudhë tjetër kimioterapie, shkruan Nature.
Halassy studioi literaturën dhe vendosi ta provonte vetë trajtimin viroterapia onkolitike (OVT) me dy viruse që nuk i kanë kaluar ende provat klinike. Ajo ishte e vetëdijshme se kishte disa rreziqe të efekteve anësore serioze, veçanërisht nga virusi i stomatitit vezikular VSV.
OVT është një qasje e re trajtimi që përdor viruset për të sulmuar qelizat e kancerit dhe për të aktivizuar sistemin imunitar, i cili angazhohet në shkatërrimin e qelizave tumorale.
Rasti i studimit të Halassy është botuar në revistën Vaccines. Virologia filloi të provonte një trajtim të paprovuar për kancerin duke kombinuar një virus fruthi dhe një patogjen të ngjashëm me gripin për të krijuar një goditje të fuqishme që sulmonte tumorin drejtpërdrejt dhe ndihmoi sistemin imunitar.
Qasja ishte efektive. Tumori është tkurrur ndjeshëm dhe nuk ka infiltruar muskulin e poshtëm ose lëkurën e sipërme. Për më tepër, ai u bë më i butë dhe u nda nga muskujt dhe lëkura në mënyrë që u hoq me sukses kirurgjik. Halassy përfundoi gjithashtu një terapi ndihmëse njëvjeçare me trastuzumab, në përputhje me rekomandimet për trajtimin e kancerit të gjirit.
Pas këtij trajtimi, Halassy është pa kancer prej katër vitesh. Kjo vaksinë eksperimentale e vetë-administruar, e ndihmoi atë të trajtonte kancerin e fazës 3.
Më shumë rreth trajtimit
OVT është një fushë në zhvillim e trajtimit të kancerit, e cila përdor viruset për të sulmuar qelizat kancerogjene dhe më pas për të provokuar sistemin imunitar për t’i luftuar ato.
Shumica e provave klinike OVT janë kryer në kancerin metastatik në fazën e vonë. Por në vitet e fundit, shkencëtarët e kanë drejtuar aplikimin e tij edhe tek kanceret në fazat e hershme.
Sipas Halassy, virusi i fruthit dhe një virus i stomatitit vezikular të përfshirë në vaksinë, dihet se infektojnë një lloj qelize nga e cila e ka origjinën tumori i saj.
Duke mësuar këtë, ajo ishte në gjendje të kombinonte viruset në doza perfekte dhe e përdori atë për të trajtuar veten. Deri më tani, të dy patogjenët janë përdorur në provat klinike OVT. Virusi i fruthit është testuar kundër kancerit metastatik të gjirit.
Sipas raportit, Halassy po mbron përdorimin e OVT si linjën e parë të trajtimit për kancerin në vend të procedurave aktuale si kirurgjia, kimioterapia, terapia biologjike ose rrezatimi.
Komuniteti i kërkimit mjekësor është i ndarë në dukje lidhur me vetë-trajtimin e kancerit nga Halassy. Autorët e studimit, të cilët publikuan rastin e Halassy në Vaccines, megjithatë, dekurajojnë vetë-mjekimin me OVT.
“Autorët e kësaj pune të izoluar dhe jokonvencionale deklarojnë qartë se vetë-mjekimi me viruse onkolitike nuk duhet të jetë qasja e parë për trajtimin e kancerit të diagnostikuar, por dëshirojnë të inkurajojnë provat klinike formale të vlerësimit të OVT si terapi në kancerin e hershëm,” shkruan ata. /Telegrafi/
