Sekretari i ri i Përgjithshëm i NATO-s, Mark Rutte thotë se nuk sheh ndonjë kërcënim të afërt të përdorimit të armëve bërthamore nga Rusia, pavarësisht retorikës “së pamatur dhe të papërgjegjshme” të Kremlinit.
Javën e shkuar, Presidenti rus Vladimir Putin paralajmëroi përdorimin e armëve bërthamore kundër vendeve të NATO-s që lejojnë Ukrainën të godasë me armët e tyre me rreze të gjatë veprimi, territorin rus.
Komentet e Putinit erdhën pasi Ukraina kërkoi miratimin për të përdorur raketa perëndimore me rreze të gjatë veprimi kundër objekteve ushtarake në Rusi.
Putin kërcënon Perëndimin me armë bërthamore
Ndërkohë, Rutte në konferencën e tij të parë për shtyp që nga marrja e detyrës në krye të aleancës ushtarake tha se ai mbështet të drejtën e Ukrainës për të kryer sulme të tilla.
Më tej, në fjalën e tij, ai u bëri thirrje vendeve të NATO-s që të vazhdojnë të armatosin Ukrainën duke thënë se sa më shumë që ta ndihmojnë atë, aq më shprejt lufta do të përfundojë.
“Kostoja e mbështetjes së Ukrainës është shumë, shumë më e ulët, sesa kostoja me të cilën do të përballeshim nëse e lejojmë Putinin të arrijë qëllimin e tij”, tha Rutte, duke përsëritur angazhimin e paraardhësit të tij për ta sjellë Ukrainën më afër anëtarësimit në NATO.
Ai pranoi se situata në fushën e betejës në Ukrainë ku Rusia po bën përparim të ngadalshëm, por të qëndrueshëm është e vështirë./tvklan.al
