Kryeministri Edi Rama thotë se lirimi nga pala serbe i 3 policëve të Kosovës është lajm i mirë, edhe pse i vonuar.
Në një reagim në rrjetet sociale, Kryeministri Rama bën të ditur se është takuar në Bruksel me Presidentin e Këshillit Europian, Charles Michel, me të cilin ka biseduar për marrëdhënien mes Kosovës e Serbisë.
E sa i përket normalizimit të marrëdhënieve mes dy vendeve, sipas Ramës, tani është i domosdoshëm de-eskalimi i menjëhershëm i situatës.
“Domosdoshmëria e de-eskalimit të menjëhershëm, e cila është rruga e duhur drejt fazës finale të Dialogut për Marrëveshjen e Normalizimit mes Kosovës e Serbisë, duhet kuptuar qartë nga të dyja palët edhe si një detyrim madhor ndaj krejt rajonit, i cili nuk mund të merret peng nga askush”. /tvklan.al
