President i Kinës, Xi Jinping, do ta vizitojë Rusinë javën e ardhshme me ftesë të presidentit rus, Vladimir Putin, ka njoftuar sot Ministria e Jashtme kineze.
Kjo do të jetë vizita e parë e Xi-së në Moskë, që kur Putini filloi pushtimin e Ukrainës më shumë se një vit më parë.
Gjatë vizitës, Xi dhe Putin do të diskutojnë bashkëpunimin strategjik midis dy vendeve, sipas Kremlinit.
“Gjatë bisedimeve do të diskutohen çështje aktuale të zhvillimit të mëtejshëm të marrëdhënieve të partneritetit gjithëpërfshirës dhe bashkëpunimit strategjik midis Rusisë dhe Kinës”, tha Kremlini në një deklaratë të premten.
“Është planifikuar edhe një shkëmbim pikëpamjesh në kuadër të thellimit të bashkëpunimit ruso-kinez në arenën ndërkombëtare”, shtoi Kremlini.
Vizita vjen teksa Kina përpiqet të prezantohet si një ndërmjetës neutral i paqes në Ukrainë, por kjo përpjekje është pritur me skepticizëm në vendet perëndimore për shkak të partneritetit në rritje të Pekinit me Moskën.
Xi dhe Putin deklaruan një miqësi “pa kufij” në shkurt të vitit të kaluar, kur udhëheqësi rus vizitoi Pekinin për ceremoninë e hapjes së Lojërave Olimpike Dimërore. Javë më vonë, tanket ruse u futën në Ukrainë.
Që atëherë, Kina ka refuzuar të dënojë pushtimin e Rusisë, në vend të kësaj duke fajësuar përparimin e NATO-s për provokimin e konfliktit dhe përsëritjen e qëndrimit të Kremlinit
Ajo gjithashtu ka ofruar mbështetje diplomatike për Moskën, duke forcuar lidhjet ekonomike dhe ushtarake me fqinjin e saj verior, raporton CNN, transmeton Klankosova.tv.
Në javët e fundit zyrtarët perëndimorë kanë filluar të ngrenë publikisht shqetësimet se Kina mund të jetë duke konsideruar t’i japë Rusisë ndihmë vdekjeprurëse ushtarake, një akuzë e mohuar nga Pekini.
Xi është takuar personalisht me Putinin 39 herë që kur u bë lider i Kinës, së fundmi në shtator gjatë një samiti në Azinë qendrore.
