BYTYQI: PO NDJEKIM LËVIZJET E TREGUT NË EVROPË
Prej nesër makaronat do të lirohen me 15 për qind dhe produktet e qumështit me 10 për qind. Çmimet e vjetra ende janë në raftet e dyqaneve e për këtë Zy. Kryeministri për Çështje Ekonomike Fatmir Bytyqi theksoi se prodhuesit po presin ditën e fundit, e për këtë pritet të shihet nesër.
Prej nesër do të hyjnë në fuqi masat e reja për ngrirje të çmimëve të disa produkteve ushqimore. Makaronat do të lirohen me 15 për qind dhe produktet e qumështit me 10 për qind. Për këto produkte, nga data 13 mars deri më 31 maj të këtij viti, u hoqën taksat doganore të importit. Vetëm me heqjen e taksës doganore, sipas përllogaritjeve të Qeverisë, çmimi i tyre ulet për 8 deri në 9 denarë mesatarisht në shitje me pakicë. Çmimet e vjetra ende janë në raftet e dyqaneve e për këtë Zy. Kryeministri për Çështje Ekonomike Fatmir Bytyqi theksoi se prodhuesit po presin ditën e fundit, e për këtë pritet të shihet nesër.
”Me sa duket jemi mësuar me këtë në shoqërinë tonë, është gjithmonë dita e fundit, edhe nëse është për një punë të mirë presim ditën e fundit. Do të shohim nesër në mëngjes çmimet që thamë” – tha Fatmir Bytyqi.
Sipas Bytyqit Qeveria po ndjek lëvizjet e tregut në Evropë. Çmimet janë në rënie, tha ai, ndërsa përballimin e krizës ekonomike e vlerësoi të suksesshëm.
“Rezultatet janë të dukshme. Kjo do të thotë se në vendin tonë tregtarët duhet të ndjekin të njëjtat tendenca. Nëse lëndët e para bazë bien, çmimet do të duhet të vazhdojnë të bien gjithashtu” – tha Bytyqi.
Ai i bëri thirrje Inspektoratit Shtetëror i Tregut që të dalin në terren dhe të veprojnë menjëherë pas hyrjes në fuqi të vendimeve të Qeverisë. Gjobat për mosrespektim të vendimeve janë nga 800 deri në 10.000 euro, varësisht nga madhësia dhe lloji i operatorit ekonomik. Ndryshe, Qeveria më 28 shkurt të këtij viti e ngriu çmimin e bukës së bardhë dhe gjysmë të bardhë për 33 denarë. /KlanMacedonia/
