Qeveria daneze ka thënë se do të shqyrtojë mjetet ligjore për të ndaluar protestat që përfshijnë djegien e teksteve të shenjta në rrethana të caktuara, duke përmendur shqetësimet e sigurisë pas një reagimi të ashpër mbi incidente të tilla që panë të përdhosur Kuranin në Danimarkë dhe Suedi.
Duke vënë në dukje se protesta të tilla ishin në dobi të ekstremistëve, qeveria dëshiron të “eksplorojë” ndërhyrjen në situata ku “vendet, kulturat dhe fetë e tjera po ofendohen dhe ku kjo mund të ketë pasoja të rëndësishme negative për Danimarkën, jo më pak në lidhje me sigurinë”, thuhet në deklaratën e Ministrisë së Jashtme.
“Kjo sigurisht që duhet të bëhet brenda kornizës së lirisë së shprehjes të mbrojtur me kushtetutë dhe në një mënyrë që nuk ndryshon faktin se liria e shprehjes në Danimarkë ka një shtrirje shumë të gjerë”, u shtua në deklaratë, duke theksuar se liria e shprehjes ishte një nga vlerat më të mira dhe më të rëndësishme të vendit.
Disa protesta të kohëve të fundit që përfshijnë përdhosjen e librit të shenjtë mysliman kanë ngritur tensione diplomatike në të gjithë Lindjen e Mesme dhe dy vendet nordike, shkruan The Guardian.
Qeveria daneze vuri në dukje se protestat kishin arritur në një nivel ku Danimarka, në shumë pjesë të botës po shihet si një vend që lehtëson fyerjen dhe denigrimin e kulturave, feve dhe traditave të vendeve të tjera.
Në një deklaratë të veçantë, kryeministri suedez, Ulf Kristersson, tha se ai kishte qenë në kontakt të ngushtë me homologen e tij daneze, Mette Frederiksen, dhe se një proces i ngjashëm tashmë ishte duke u zhvilluar në Suedi.
“Ne kemi filluar gjithashtu të analizojmë situatën ligjore tashmë … në mënyrë që të shqyrtojmë masat për të forcuar sigurinë tonë kombëtare dhe sigurinë e suedezëve në Suedi dhe në mbarë botën”, tha Kristersson.
