Në Qeveri sot duhet të mbahen bisedime mes përfaqësuesve të Qeverisë dhe Sindikatës përfaqësuese të AOGJSH. Në takim do të diskutohet mbi problemet në shërbimet e Prokurorisë Publike dhe ato të gjykatave.
Në periudhën e kaluar, të punësuarit protestuan duke kërkuar rritjen e pagave për 78 për qind dhe kthimin e shtesave në pagë.
Të enjten e kaluar, administrata gjyqësore ka paralajmëruar se nuk do t’i trajtojë asnjë nga rastet urgjente derisa Qeveria nuk ulet në tryezën e bisedimeve me Sindikatën.
“Qeveria duhet të jetë e vetëdijshme se nëse grupi i punës nuk ulet për të biseduar edhe pas kësaj proteste e gjithë drejtësia do të paralizohet. Çdo zvarritje e mëtejshme dhe anashkalim i zgjidhjes do të shkaktojë zemërim shtesë te grevistët dhe Sindikata e AOGJSH nuk do të mbajë përgjegjësi për pasojat”, deklaroi të enjten e kaluar kryetari i AOGJSH-së, Tërpe Dejanoski.
Më parë, rreth një muaji, Qeveria formoi grupin punues për zgjidhjen e kërkesave të administratës gjyqësore.
