Ministri i Punëve të Jashtme, Bujar Osmani, thotë se është i bindur se procesi për ndryshimet kushtetuese në vend do të përfundojë me sukses në javët dhe muajt në vijim, përcjell KlanM.
“Procesi ka filluar, siç e shihni, e gjithë bota, si SHBA-ja ashtu edhe BE-ja, e mirëpritën vendimin për fillimin e procesit. I bindur se ky proces do të përfundojë me sukses në javët dhe muajt e ardhshëm”, tha Osmani për MIA-n gjatë pjesëmarrjes së tij në Forumin Strategjik të Bledit.
Ai tha se forumi është një tjetër platformë për të dërguar mesazhin se deri në vitin 2030 duhet të bëhet një hap më thelbësor për integrimin e Ballkanit Perëndimor në BE.
“Kjo është një platformë tjetër ku jo vetëm ne, por edhe vendet e Ballkanit Perëndimor mund të takohemi me Bashkimin Evropian dhe të japim mesazhin se duhet bërë një hap më thelbësor në këtë proces në këtë kontekst të ri gjeopolitik në të cilin ndodhet Evropa dhe sepsekjo dekadë duhet të jetë dekada e Ballkanit Perëndimor. Mendoj se mesazhet nga të gjitha anët janë të tilla që Ballkani Perëndimor të jetë pjesë e BE-së deri në vitin 2030″, tha Osmani.
Shefi i diplomacisë në Bled ka zhvilluar një takim me ministren e Punëve të Jashtme të Republikës së Koresë, Park Jin dhe pret bashkëpunim më të madh në periudhën e ardhshme, veçanërisht në ekonomi dhe investime.
“Ne kemi vendosur marrëdhënie me Republikën e Koresë që nga viti 2018, ne ende po ndërtojmë besim dhe marrëdhënie dypalëshe. Ky ishte takimi i parë me ministrin dhe ramë dakord që të vazhdojmë konsultimet politike dhe takimet dypalëshe në Seul dhe Shkup dhe të zgjerojmë kornizën përgjegjëse si bazë për investime më të mëdha dhe bashkëpunim ekonomik. Presim që kompanitë e mëdha nga Republika e Koresë të vijnë në Shkup për të parë mundësitë për investim”, tha Osmani.
