Marina suedeze ka deklaruar se Rusia ka kërkuar të bëjë inspektimin e saj për rrjedhjen e Nord Stream 1 dhe 2
Suedia ka urdhëruar kryerjen e hetimeve shtesë për dëmin e shkaktuar muajin e kaluar në dy tubacionet Nord Stream. Nord Stream AG aksioneri më i madh i të cilit është gjigandi shtetëror energjetik i Rusisë Gazprom dërgoi një anije me flamur rus posaçërisht për të hetuar dëmtimin e tubacioneve nën Detin Baltik.
Anija që mban flamurin rus do ketë në bord specialistë për të vlerësuar dëmin në zonën ekonomike të Suedisë dhe hetimi do të zgjasë tre deri në pesë ditë. Jimmie Adamsson, zëdhënës i marinës suedeze, tha se pronarët e Rrjedhës Veriore 1 informuan disa javë më parë se donin të kishin inspektimin e tyre për dëmtimin e tubacionit.
Adamsson shtoi se nuk kishte nevojë për leje dhe se “në zonën ekskluzive ekonomike suedeze çdokush mund të bëjë këtë lloj inspektimi”. Marina suedeze njoftoi se kishte filluar inspektimet e tyre të reja këtë javë për të plotësuar hetimet e mëparshme, por nuk u dhanë më shumë detaje për atë që po kërkonin të zbulonin.
Autoritetet suedeze njoftuan në fillim të tetorit se kishin kryer një inspektim nënujor dhe kishin mbledhur prova dhe se inspektimi mbështeti dyshimet për sabotim. Katër rrjedhje u shfaqën në dy tubacionet Rrjedha Veriore 1 dhe 2 në Detin Baltik në brigjet e ishullit danez të Bornholm në fund të shtatorit.
Tubacionet, të cilat lidhin Rusinë me Gjermaninë, kanë qenë në qendër të tensioneve gjeopolitike pasi Rusia ndërpreu furnizimet me gaz në Evropë si hakmarrje ndaj sanksioneve perëndimore mbi pushtimin e Ukrainës. Në lidhje me këtë, presidenti rus Vladimir Putin një ditë më parë në fjalimin e tij u shpreh se pretendimet për dëmtimin e qëllimshëm të tubacioneve nga Rusia ishin të çmendura.
Klan News
