Demonstruesit marshuan në disa qytete franceze ku kërkuan ndryshim të reformës së pensioneve, 81 persona u arrestuan
Një tjetër natë trazirash në Paris. Policia e Parisit u përlesh me demonstruesit, të cilët vijuan në të gjithë vendin, në shenjë zemërimi për miratimin e rritjes së moshës së pensionit në 64 vjeç.
Trazirat dhe grevat në rritje e kanë lënë Presidentin Emmanuel Macron të përballet me sfidën më të rëndë ndaj pushtetit të tij që nga të ashtuquajturat protestat e “jelekverdhëve” katër vjet më parë.
“Macron, jep dorëheqjen” dhe “Macron do të ikë, ne do të fitojmë,” brohoritën demonstruesit në Place d’Italie në Parisin jugor. Policia përdori gaz lotsjellës dhe u përlesh me turmën. Demonstruesit i vunë flakën çdo gjëje përreth.
Autoritetet komunale kishin ndaluar tubimet në Place de la Concorde në Paris dhe Champ-Elysees pas demonstratave që çuan në 81 arrestime. Më herët në kryeqytetin francez, një grup studentësh dhe aktivistësh nga sindikata “Revolution Permanente” marshuan në qendrën tregtare Forum des Halles, duke valëvitur pankarta duke bërë thirrje për një grevë të përgjithshme dhe duke thirrur “Paris ngrihu, ngrihu”.
Demostrata u mbajtën edhe në qytete të tilla si Nantes në perëndim dhe Marseille në jug. Në Bordo, në jugperëndim, policia përdori edhe gaz lotsjellës kundër protestuesve që kishin hapur zjarr ndaj koshave të mbeturinave.
“Reforma duhet të zbatohet. Dhuna nuk mund të tolerohet“, tha ministri i Financave Bruno Le Maire për gazetën Le Parisien.
Një aleancë e gjerë e sindikatave kryesore të Francës ka paralajmëruar se do të vazhdojë të mobilizohet për të detyruar qeverinë të ndryshojë reformën.
Rreth 37% e stafit në rafineritë dhe depot e TotalEnergies në Francën juglindore dhe Normandinë në veri gjithashtu mbajtën grevë dhe janë zotuar të vazhdojnë deri në ndryshimin e reformës.
Klan News
