PTHP ngren kallëzim penal ndaj 18 personave
Prokuroria themelore publike në Shkup ka ngritur kallëzim kundër 18 personave fizik dhe një personi juridik për disa vepra penale, përfshirë kontrabandën e vazhdueshme, falsifikimin e dokumenteve, falsifikimin kompjuterik, fshehjen e mallrave që i nënshtrohen kontrabandës dhe mashtrimit doganor, parandalimin e provave dhe për abuzimin e të dhënave personale. Sipas Prokurorisë, nga gushti i vitit 2020 deri në prill të vitit 2022, të pandehurit kanë kryer transferimin përmes linjës doganore të mallit të padeklaruar – vetura luksoze në vlerë totale në masë të madhe.
“Ata shmangnin kontrollin doganor, falsifikonin dokumente zyrtare dhe përdornin dokumente publike false si të vërteta për të regjistruar makinat dhe më pas për të mbuluar krimet i kishin fshehur automjetet dhe ia shisnin disa herë njëri-tjetrit në periudhë të shkurtër kohore. Edhe personi juridik – autosalloni nga Koçani akuzohet për fshehje të veturave të cilat kanë qenë objekt i kontrabandës dhe mashtrimit doganor”, thonë nga PTHP.
Në mesin e të pandehurve, sipas prokurorisë, janë pesë zyrtarë për çështje administrative në MPB, të cilët gjatë gjithë asaj periudhe ua kanë vënë në dispozicion të tjerëve mjetet për kryerjen e krimeve – targat dhe lejet e qarkullimit të bëra në kundërshtim me Ligjin.
“Makinat, shumica e të cilave ishin objekt i kërkimeve ndërkombëtare, janë blerë në vende të ndryshme evropiane dhe janë futur në vend me numra identifikimi të ndryshuar të shasisë dhe dokumente të falsifikuara për të fshehur origjinën e tyre. Më pas zyrtarët e akuzuar nga MPB-ja i kanë regjistruar veturat në bazë të dokumentacionit të rremë. Pas blerjeve dhe shitjeve të shumta reciproke, të pandehurit i kanë tjetërsuar përgjithmonë makinat, duke ua shitur ato personave fizikë dhe juridikë në vend. Gjatë hetimeve, prokurori publik ka ofruar dëshmi se kjo metodë është përdorur për kontrabandimin e gjithsej 15 automjeteve me vlerë të përgjithshme mbi gjysmë milioni euro”, thuhet në njoftimin e Prokurorisë.
Për tre nga të pandehurit, mes tyre edhe një shtetas i Republikës së Serbisë me qëndrim të përkohshëm në vend, prokurori publik kompetent ka propozuar vazhdimin e masës së paracaktuar të paraburgimit./KlanMacedonia
