Moti i keq që ka përfshirë Shqipërinë me erëra të forta dhe reshje të dendura shiu, ka detyruar Policinë e Shtetit, që tu bëjë thirrje drejtuesve të mjeteve, udhëtarët dhe këmbësorët, që të jenë të kujdesshëm.
Policia këshillon shoferët që të bëjnë kujdes të madh me shpejtësinë, duke e mbajtur të ulur atë, pasi ka prezencë uji në rrugë në disa qarqe të vendit. Ajo kërkon edhe respektimin e tabelave rrugore si dhe dhënies përparësi këmbësorëve, por edhe kërkon mospërdorimin e telefonit celular dhe vendosjen e rripit të sigurimit.
Sipas policisë, nuk duhen kryer në asnjë mënyrë parakalimeve të gabuara, të cilat mund të sjellin aksidente. Nga ana tjetër edhe përdoruesit e monopatinave, motorëve apo biçikletave, këshillohen që të përdorin veshje fosforeshente.
“Nisur nga moti i keq, me reshje të dendura shiu dhe erë të fortë, Policia Rrugore apelon për:
-Kujdes maksimal për përdoruesit e rrugës
-Moderoni shpejtësinë, pasi në disa akse rrugore ka prezencë të ujit
-Jepini përparësi këmbësorëve dhe respektoni sinjalistikën rrugore
-Mos përdorni telefonin gjatë drejtimit të mjetit dhe vendosni rripin e sigurimit
-Mos kryeni parakalime të gabuara
-Drejtuesit e motomjeteve, biçikletave dhe monopatinave: Të veshin jelek fosforeshent gjatë natës për të shmangur përfshirjen në ngjarje rrugore
-Këmbësorët: Të tregojnë kujdes maksimal kur kalojnë nga njëri kah i rrugës në tjetrin
Policia Rrugore është në detyrë për të parandaluar ngjarjet rrugore dhe për t’ju ardhur në ndihmë përdoruesve të rrugës në nevojë.
Kontributi i të gjithëve është thelbësor për të shmangur aksidentet dhe për të eliminuar vonesat në trafik. Për çdo problematikë që lidhet me punën e Policisë, telefononi në numrin pa pagesë 112″., njofton policia.
