Sekretari i Shtetit i SHBA, Antony Blinken u ka kërkuar ligjvënësve kroatë të Bosnje Hercegovinës që të ndalojnë shtyrjen e legjislacionit për ndërtimin e një tubacioni gazi natyror me Kroacinë, i parë si një alternativë ndaj gazit rus, raportuan mediat lokale të enjten.
Në një letër drejtuar Ministrit të Jashtëm të Bosnjës, Elvedin Konakoviq, e datës 11 janar dhe e publikuar nga portali i lajmeve “Istraga.ba”, Blinken i bëri thirrje Konakoviqit që të shtyjë Dragan Çoviqin, liderin e HDZ-së, partisë më të madhe kroate në Bosnje, “për t’i dhënë fund pengesës së tij për këtë çështje”.
Blinken tha se të njëjtën kërkesë i kishte dërguar edhe ministrit të jashtëm të Kroacisë, Gordan Grliq-Radman.
Bosnja nuk ka rezerva gazi, por përdor gaz natyror deri në 8% të përdorimit të saj të energjisë. Ai mbështetet vetëm në furnizimet me gaz rus të cilin e merr nëpërmjet Serbisë përmes gazsjellësit TurkStream.
Projekti për ndërtimin e Gazsjellësit të Interkoneksionit Jugor, që sjell gazin natyror në Bosnje nga një terminal LNG në ishullin kroat të Krk, u miratua dy vjet më parë në dhomën e ulët të parlamentit të Federatës Boshnjako-Kroate, por është bllokuar në dhomën e sipërme.
Federata Boshnjako-Kroate është një nga dy rajonet autonome që përbëjnë Bosnjën e pasluftës.
Fraksioni kroat në dhomën e lartë të parlamentit, ose Dhoma e Popullit, e ka kushtëzuar miratimin e projektit me krijimin e një operatori të ri të sistemit të transmetimit që do të bazohej në pjesën e mbizotëruar nga kroatët e Bosnjës, pavarësisht ekzistencës së një operatori të tillë , kompania BH Gas, në Sarajevë, shkruan Reuters, transmeton Klankosova.tv.
