Charles Michel tha se Kremlini po përdor ushqimin si një “armë të heshtur të luftës”
“Lojërat e rrezikshme ruse të urisë” janë fajtori i vetëm për krizën globale të ushqimit, tha presidenti i Këshillit Evropian Charles Michel në samitin e G7-tës.
Udhëheqësit e shtatë vendeve më të pasura të botës u mblodhën në Gjermani për bisedime mbi sanksionet shtesë kundër Rusisë dhe rindërtimin afatmesëm dhe afatgjatë të Ukrainës.
Gjatë një konference për shtyp në samit, Michel tha se Kremlini po përdor ushqimin si një “armë të heshtur të luftës”.
“Ne duhet të kundërshtojmë fuqishëm propagandën e Rusisë për çmimet e ushqimit dhe plehrave”, tha ai, duke shtuar se BE-ja po mbështet përpjekjet e OKB-së për të rihapur rrugët detare në një mënyrë që adreson gjithashtu shqetësimet e sigurisë së Ukrainës.
Ai tha se po mbështeten edhe iniciativat globale për sigurinë ushqimore.
“BE-ja po punon për të mobilizuar afro 600 milionë euro për të mbështetur partnerët më të prekur”, shtoi Michel.
Ai ripohoi gjithashtu se blloku është i përkushtuar për të mbështetur rindërtimin e Ukrainës.
“Me vendet e G7-tës, ne të gjithë ndajmë të njëjtat synime: të shkurtojmë oksigjenin nga makineria e luftës ruse duke u kujdesur për ekonomitë tona. BE-ja do të qëndrojë pranë Ukrainës për një kohë të gjatë”, deklaroi kreu i Këshillit.
Takimi treditor i G7-tës në Schloss Elmau në Alpet bavareze filloi sot.
Agjenda e G7-tës konsiderohet më urgjente se kurrë, ndërsa lufta e Rusisë në Ukrainë vazhdon. Vlen gjithashtu të përmendet se samiti po mbahet përpara se vendet anëtare të NATO-s të negociojnë ristrukturimin e aleancës në kohë lufte në samitin në Madrid më 28-30 qershor./AA
