Ministri i Drejtësisë, Krenar Lloga ka dorëzuar sot në Gjykatën Kushtetuese 10 iniciativa në emër të ministrisë që e drejton dhe 10 të tjera në emër të tij personal, përcjell KlanM.
Iniciativat, siç njoftojnë nga Ministria e Drejtësisë, kanë të bëjnë me akte të botuara në Gazetën zyrtare pas afatit të paraparë, njejtë siç ishte iniciativa që kjo gjykatë e zbatoi ndaj Udhëzimit të Llogës për grafën etnike në certifikatat e lindjes.
“Tani radhën e kanë gjyqtarët e respektuar të Gjykatës Kushtetuese, nga të cilët presim që të prononcohen për nismat me të njëjtin efikasitet, shpejtësi dhe përpikshmëri si në Udhëzimin për Librat Amë në seancën e kaluar të hapur”, thotë Lloga pas dorëzimit të iniciativave, përcjell KlanM.
Në iniciativat e Llogës, siç njoftohet, potencohet se në periudhën e kaluar është bërë publikimi i disa akteve për të cilat ka obligim kushtetues të publikohen në “Gazetën Zyrtare të Republikës së Maqedonisë së Veriut”, të cilat janë publikuar në kundërshtim me nenin 52, pra nuk është respektuar afati kushtetues prej shtatë ditësh për publikim të akteve.
Nga Gjykata Kushtetuese kërkohet gjithashtu që sipas detyrës zyrtare të shqyrtojë kushtetutshmërinë e akteve për të cilat nuk është respektuar afati kushtetues prej shtatë ditësh për publikimin e tyre./KlanMacedonia
