Kush deshi ta “dorëzojë” ish ushtarin e UÇK-së, Blerim Ramadani në Serbi, prokuroria, gjykata, politika apo ministritë?
Këto janë dilemat që së fundmi kanë mbetur pa përgjigjen të cilën shumë e kërkon opinioni.
Dilemave të hapura nga partitë politike u është përgjigjur, avokati Naser Raufi, i cili në një prononcim për Klan Maqedoni ka spjeguar në detaje se cili është ograni që vendos për ekstradim ose mos ekstradim të një personi nga një në tjetër shtet dhe cili është organi që vendos për paraburgim të një personi.
Rolin kyç për marrjen e vendimit per paraburgim e ka Gjykata Penale dhe jo Prokuroria, shpjegon Raufi.
“Procedura për ekstradim praktikisht është ndërmjet ministrive të drejtësisë, Ministria e Drejtësisë së Maqedonisë së Veriut dhe ajo e Serbisë. Dy ministritë kanë kompetenca për procedurën e ekstradimit. Fletarrestin e jep Interpolli. Mandej, procedura shkon te gjykata, me propozim të prokurorisë themelore, propozimin për paraburgim e jep prokurori, megjithatë, për paraburgimin, vendos gjykata, jo prokuroria”, tha Raufi.
Raufi thotë se Kosova tashmë është shtet në vete dhe se nënshtetasit e Republikës së Kosovës nuk mund të ekstradohen në një shtet tjetër, në këtë rast në Serbi.
“Kosova është republikë në vete dhe nuk mundet assesi që të ekstradohet një person në territorin e një shteti tjetër që e kërkon, për krim të bërë, hipotetikisht them të bërë apo jo, por për dyshime që është bërë në teritorin e Republikës së Kosovës. Kompetencën e ka vetëm Republika e Kosovës eventualisht të kërkojë ekstradim, por jo edhe Serbia”, deklaroi Raufi
Sipas avokatit Naser Raufi, lëndët e ngritura nga Serbia mund të jenë edhe fiktive dhe të pa baza. Ai kërkon sinkronizimin e institucioneve në vend dhe mos arrestimin e ish ushtarëve në pika kufitare. Raufi thotë se Qeveria e vendit duhet urgjentisht ta ndalë agoninë që po u bëhet ish ushtarëve të Ushtrisë Çlirimtare.
“Duhet që Qeveria e RMV-së ta ndërpresë këtë agoni që u bëhet ish ushtarëve të UÇK-së dhe këto persona kur e kalojnë kufirin e RMV-së, të kthehen në Kosovë ose pa marrë parasysh se ku shkojnë për kësi fletarreste nga ana e Serbisë që dërgohen nga ana e Serbisë, të mos realizohen”, u shpreh Raufi.
Ndryshe, në RMV ka ndodhur që të arrestohen tre ish ushtarë të UÇK-së në periudha të ndryshme, deri më tani asnjëri nuk i është dorëzuar Serbisë.
Së fundi, kishte reagim edhe nga Beogradi zyrtar i cili ka kërkuar sqarime nga RMV se pse u lejua që Ramadani të ikë drejtë Kosovës kur kërkohej nga organet hetuese në Serbi. /tvklan.mk
