Makedonija Gj.P për të katërtën herë radhazi në finale
Në stadiumin buzë liqenit të Strugës, klubi i futbollit Struga Trim Lum që drejtohet nga strategu Shpëtim Duro, me kualifikimin në finale të Kupës, arriti suksesin më të madh në historinë e vet. Struga Trim & Lum në gjysmëfinale shënoi fitore minimale 1:0 ndaj Sileksit, me një gol të vetëm që e shënoi Mexhit Neziri në minutën e 68.
Vendasit edhe në këtë ndeshje dëshmuan cilësi, krijuan shumë raste, por fati ishte që pikërisht mbrojtësi Mexhit Neziri të vendosë për këtë sukses historik të skuadrës strugane, informon Klan Macedonia.
“Jam i lumtur për golin e dhënë, më e rëndësishme është që ekipi u kualifikua në finale për herë të parë. Mendoj se me meritë u kualifikuam, pasi ishim dominues gjatë gjithë ndeshjes. Pa dyshim se ky është goli më i rëndësishëm në karrierën time edhe pse dihet se neve mbrojtësit nuk shënojmë edhe aq shpesh. Falënderojmë Zotin e madh që na ka shpërblyer në çdo ndeshje, shpresojmë kështu të jetë deri në fund dhe të dalim fitues në të dyja frontet”, ka thënë Mexhit Neziri pas përfundimit të ndeshjes.
Në ndeshjen tjetër gjysmëfinale ndërmjet Shkëndijës dhe Makedonija GjP, fitues pas ekzekutimit të penaltive doli ekipi Makedonija GjP, që realizoi tre penalti, ndërsa Shkëndija vetëm dy. Në kohën e rregullt gjatë 90 minutave, ndeshja përfundoi me rezultat të barabartë 1:1, ku të parët në epërsi kaluan mysafirët me golin e Liçina, ndërsa ekipi kuq e zi barazoi në minutën e 65 me golin e bullgarit Nasko Milev.
“Gjërat nuk shkuan si duhet edhe gjatë lojës, veçanërisht në pjesën e parë ku nuk ishim në nivelin e duhur, pjesën e dytë patëm përmirësin e dhamë golim e barazimit, krijuam edhe dy raste tjera, nuk i shfrytëzuam, futbolli është kjo. Penaltitë, fiton ekipi më i qetë, për fat të keq ne nuk e kishim atë qetësinë e duhur, edhe pse patëm në penaltinë e fundit rast për ta eliminu Makedonija-n”
Ndeshja finale do të zhvillohet me 17 maj në Shkup. /Shaban Sinani – Klan Macedonia/
