Kryeministrja franceze, Elisabeth Borne, dha dorëheqjen të hënën, teksa presidenti Emmanuel Macron kërkon t’i japë një shtysë të re mandatit të tij të dytë përpara zgjedhjeve të Parlamentit Evropian dhe Olimpiadës së Parisit këtë verë.
Macron nuk e emëroi menjëherë pasardhësin e Borne. Ndryshimi në postin e kryeministrit vjen pas një viti të dëmtuar nga krizat politike të shkaktuara nga reformat e kontestuara të sistemit të pensioneve dhe ligjet e imigracionit.
Ai gjithashtu vjen vetëm pesë muaj përpara zgjedhjeve të Parlamentit Evropian, me euroskeptikët që pritet të bëjnë fitime rekord në një kohë të pakënaqësisë së gjerë publike për rritjen e kostove të jetesës dhe dështimit të qeverive evropiane për të frenuar flukset e migracionit.
Në Francë, sondazhet tregojnë se partia e Macron është pas asaj të lideres së ekstremit të djathtë Marine Le Pen me rreth tetë deri në dhjetë pikë përpara votimit të qershorit.
Spekulimet për një riorganizim të qeverisë kishin qenë të përhapura në javët që kur miratimi i ngushtë në parlament i rregullave të ashpra të imigracionit ekspozoi çarje të thella në shumicën e Macron. Vetë Macron premtoi një nismë të re politike.
Teksa ata që citohen si kandidatë të mundshëm për të zëvendësuar Borne janë ministri 34-vjeçar i Arsimit, Gabriel Attal, dhe ministri i Mbrojtjes 37-vjeçar, Sebastien Lecornu, secili prej të cilëve do të ishte kryeministri më i ri i Francës.
Ministri i Financave, Bruno Le Maire, dhe ish-ministri i Bujqësisë, Julien Denormandie, janë përmendur gjithashtu nga ekspertët si opsione të mundshme. Ndërrimi i kryeministrit nuk do të çojë domosdoshmërisht në një zhvendosje të politikës, por përkundrazi do të sinjalizojë një dëshirë për të shkuar përtej reformave të pensioneve dhe imigracionit dhe për t’u fokusuar në prioritete të reja, duke përfshirë arritjen e punësimit të plotë, shkruan Reuters, transmeton Klankosova.tv.
