Presidenti amerikan, Donald Trump ka deklaruar se do të vendosë tarifa sekondare prej 25 deri në 50 përqind për gjithë naftën ruse nëse e ndjen se Moska po pengon përpjekjet e tij për të përfunduar luftën në Ukrainë, dhe ato mund të hyjnë në fuqi brenda një muaji nëse nuk ka armëpushim.
Trump tha për NBC News se ishte i zemëruar dhe “i shqetësuar” kur presidenti rus, Vladimir Putin kritikoi besueshmërinë e udhëheqjes së presidentit ukrainas, Volodymyr Zelensky.
Lideri amerikan tha në një bisedë telefonike për NBC News se planifikon të bisedojë këtë javë me Putinin.
Gjatë fushatës presidenciale për vitin 2024, 78-vjeçari ka premtuar disa herë se do të përfundojë atë që ai e quan “luftë të turpshme” në Ukrainë, dhe këtë çështje e ka fokusuar fort që kur mori detyrën më 20 janar. Trump ka kërkuar zgjedhje të reja në Ukrainë dhe në një moment e quajti diktator Zelenskyn.
Putin sugjeroi të premten se Ukraina duhet të vihet nën një lloj administrate të përkohshme për të mundësuar zgjedhje të reja dhe nënshkrimin e marrëveshjeve kyçe.
“Nëse Rusia dhe unë nuk arrijmë një marrëveshje për të ndaluar masakrat në Ukrainë, dhe nëse unë e shoh se kjo është faji i Rusisë, do të vendos tarifa sekondare për naftën, për gjithë naftën që vjen nga Rusia. Do të thotë se, nëse blini naftë nga Rusia, nuk mund të bëni biznes në Shtetet e Bashkuara”, shtoi ai, “ekziston një tarifë prej 25 përqind për gjithë naftën, dhe një tarifë prej 25 deri në 50 përqind për gjithë naftën”.
Trump tha se tarifat për naftën ruse do të hyjnë në fuqi brenda një muaji nëse nuk ka një marrëveshje për armëpushim.
