Kosova së shpejti do ta ketë muzeun e Gjenocidit dhe Përpjekjes për Liri.
Kështu ka njoftuar kryeministri i vendit, Albin Kurti, në mbledhjen e sotme të qeverisë ku tha se Kosova do ta ketë një muze të dinjitetshëm ku do të tregohen krimet e Serbisë ndaj popullit tonë, raporton Klankosova.tv.
“Ende janë të njoma dhe të hapura plagë të shumta dhe ende është e rëndë dhimbja e pikëllimi nga vrasjet, masakrat dhe krimet e forcave policore dhe ushtarake të Serbisë të urdhëruara nga shteti serb mbi shqiptarët në Kosovë. Një çerekshekulli liri, një brez i tërë janë lidhur dhe pasluftës janë rritur. Gjeneratat e reja duhet të kenë një mundësi të njohjes së të kaluarës sonë, të dëshirës për të jetuar në liri dhe të dashurisë së parreshtur për Kosovën në kohërat më të vështira dhe në kushtet më të rrezikshme”.
“Të gjitha provat e krimeve të kryera gjatë luftës në Kosovë, të mbledhura nga organizata e gjykata ndërkombëtare, bashkë me prova dhe dëshmi të mbledhura deri më tani, po grumbullohen dhe po vazhdojnë të sillen në Institucionet e Republikës së Kosovës për ruajtjen dhe mirëmbajtjen e kujtesës kolektive duke i sistematizuar dhe kategorizuar ato. E pas themelimit të grupit punues për hartimin e konceptit të muzeut të Gjenocidit dhe Përpjekjes për Liri, sot kemi vendimin për themelimin e këtij institucioni muzeal. Vendi ynë do të ketë një muze të dinjitetshëm ku do të tregohen krimet e Serbisë ndaj popullit tonë. Ky muze është institucionalizimi i kujtesës sonë kolektive dhe dëshmi e krimeve të Serbisë ndaj Kosovës”, tha shefi i qeverisë, njofton Klankosova.tv.
Ministri i Kulturës, Hajrulla Çeku tha se ky muze ka për synim dokumentimin dhe prezantimin e ish-Jugosllavisë dhe Serbisë ndaj shqiptarëve dhe të tjerëve në Kosovë.
“Do të sigurojmë që e kaluara e dhunshme të kujtohet. Ministria e Kulturës do të marrë të gjitha hapat përkatës për hartimin e muzeut. Për këtë qëllim kemi ndarë edhe buxhetin. Institucioni i muzeut do të vendoset në ndërtesën ku aktualisht vepron Ministria e Kulturës, pra në sheshin “Nënë Tereza” në Prishtinë”, tha Çeku, njofton Klankosova.tv.
