Qeveria e Kosovës është vënë në përpjekje për të siguruar bazën ligjore për mbajtjen e zgjedhjeve të reja në veri të Kosovës, duke hartuar një dokument që do t’u mundësonte qytetarëve të komunave shkarkimin e kryetarëve të tyre përmes një peticioni.
“Grupi punues ka afat një muaj që ta bëjë draftin e këtij udhëzimi administrativ, faktikisht të përfundoj edhe konsultimet publike dhe mandej të jetë nga 1 shatori si udhëzim administrativ me të cilin mund të referohen qytetarët të cilët kanë për qëllim organizim të peticioneve apo largimin e kryetarëve”, tha ministri i Administrimit të Pushtetit Lokal, Elbert Krasniqi.
Ministri i pushtetit lokal Elbert Krasniqi tha se me këtë dokument pritet të përcaktohet rregullat se si të organizohet peticioni, i cili sipas tij duhet të shprehë vullnetin e 20 për qind të votuesve të një komune për të pasur sukses.
Zgjedhjet e reja në veri janë pjesë e hapave për uljen e tensioneve që shpërthyen pasi kryetarët shqiptarë që dolën nga zgjedhjet e 23 prillit të bojkotuara nga serbët, u dërguan në zyrat e komunave veriore me mbështetjen e policisë.
Bashkimi Evropian kërkon uljen e tensioneve përmes një plani që parasheh pezullimin e operacioneve policore në veri, zhvendosjen e kryetarëve të komunave në zyra alternative dhe shpalljen e zgjedhjeve të parakohshme me pjesëmarrje të pakushtëzuar të serbëve të Kosovës.
Qeveria e Kosovës është pajtuar për hapat e parë të uljes së tensioneve, duke zvogëluar praninë e njësive të policisë me 25 për qind në ndërtesat komunale në veri, duke u hapur rrugë zgjedhjeve të parakohshme.
Janë dy rrugë për të mundësuar shpalljen e zgjedhjeve të reja; përmes dorëheqjeve të kryetarëve aktualë dhe peticioni që sipas autoriteteve në Kosovë do të ishte mënyrë më demokratike dhe do të siguronte pjesëmarrjen e serbëve në zgjedhje.
Kryeministri i Kosovës Albin Kurti tha javën e kaluar se institucionet po përgatiten për mbajtjen e tyre por sipas tij zgjedhjet në katër komunat në veri të vendit nuk mund të mbahen pa u shtensionuar plotësisht situata.
Edhe përfaqësues të Listës Serbe, subjektit kryesor politik të serbëve të Kosovës, kanë thënë se pa shtensionimin e situatës në veri të Kosovës është e pakuptimtë të flitet për zgjedhje të reja. Përfaqësuesit të kësaj liste qëndruan javën e kaluar në Uashington për takime me zyrtarët amerikanë, në kuadër të diskutimeve mbi situatën aktuale në veri të Kosovës dhe mundësitë e uljes së tensioneve.
Ambasadori amerikan në Prishtinë Jeff Hovenier tha të martën se është e rëndësishme që situata në veri të Kosovës të shtensionohet më tej ndërsa theksoi se pret që Lista Serbe të marr pjesë në zgjedhjet e reja.
“Ne kërkojmë që Lista Serbe të luajë rolin e saj si parti politike në një Kosovë sovrane, demokratike dhe të pavarur. Ne nuk e konsiderojmë atë si parti politike serbe, ne e konsiderojmë si një parti politike të serbëve etnikë në Kosovë, duhet ta bëj të qartë këtë”, tha ambasadori Hovenier.
Ai tha se shtensionimi i situatës dhe kthimi në normalitetit në veri të Kosovës do të mundësonte që palët të përqendrohen në zbatimin e të gjitha zotimeve që dalin nga marrëveshja e Ohrit me të cilën Kosova dhe Serbia u pajtuan të zbatojnë një plan të mbështetur nga perëndimi për normalizimin e marrëdhënieve, që është kusht për përmbushjen e aspiratave të tyre për anëtarësim në Bashkimin Evropian./VOA
