Bashkësia Islame e Kosovës i është drejtuar me një kërkesë kryeministrit të Kosovës Albin Kurti, për lejimin e bartjes së shamive në shkolla.
BIK kërkon që të hiqet e tëra pika 1.13 e nenin 3, në Udhëzimin Administrativ 06/2014, që ua ndalin bartjen e shamisë nxënëseve.
“Është kërkesë e kamotshme e Kryesisë së BIK-ut, institucioneve të saj dhe besimtarëve myslimanë që të shfuqizohet, respektivisht të hiqet e tëra pika 1.13 e nenin 3, në Udhëzimin Administrativ 06/2014, ngase është diskriminuese, dhe si e tillë në disa raste ka pas tentime që duke u thirr në këtë udhëzim, respektivisht në këtë nen t’u mohohet e drejta e shkollimit nxënëseve që bartin mbulesën myslimane – shaminë”.
Bashkësia Islame kërkon nga Ministria e Arsimit, Shkencës dhe Teknologjisë dhe kryeministri Albin Kurti, që ta anulojnë këtë vendim.
“Kërkojmë nga organet kompetente, Ministria e Arsimit, Shkencës e Teknologjisë, si dhe nga kryeministri z. Albin Kurti, që sa më parë ta anulojnë këtë vendim, që në vete është diskriminues ndaj qytetareve të Kosovës – fëmijëve tanë. Mirëpo, kjo kërkesë e kamotshme e BIK-ut nuk duhet politizuar e as polarizuar, por duhet trajtuar me përgjegjësi e korrektësi maksimale”./KlanKosova
