Bashkimi Demokratik për Integrim, sic thuhet në komunikatë, do të përdorë të gjitha mekanizmat demokratikë dhe ndërkombëtarë për të ndaluar këtë vendim të rrezikshëm dhe për të mbrojtur të drejtat e shqiptarëve dhe të të gjithë qytetarëve të vendit.
Teksa afrohet dita e vendimit të Gjykatës Kushtetuese për rishikimin e Ligjit për Gjuhët, Bashkimi Demokratik për Integrim (BDI) paralajmëron edhe një herë se ky do të jetë dëmi më i madh ndaj karakterit multietnik të Maqedonisë së Veriut.
Një vendim i tillë do të përfaqësonte gozhdën e fundit në arkivolin e Marrëveshjes së Ohrit dhe një kërcënim të drejtpërdrejtë për harmoninë ndëretnike që garanton Marrëveshja e Ohrit – thonë nga BDI-ja.
“BDI u bën thirrje komunitetit ndërkombëtar, SHBA, NATO-s dhe BE-së si garantues të MO-së, shoqërisë civile si dhe Republikës së Shqipërisë dhe Republikës së Kosovës që të reagojnë me urgjencë ndaj këtij rreziku që i kanoset frymës dhe arritjeve të Marrëveshjes së Ohrit. Nuk mund dhe nuk duhet të lejojmë që vetë thelbi i marrëveshjes së paqes të vihet në rrezik. Kjo është vija që nuk duhet dhe nuk mund të kapërcehet!” – thonë nga BDI.
Gjykata Kushtetuese paralajmëroi se seanca ku kontestohet Ligji për Gjuhët do të jetë në dhjetor.
Sipas Gjykatës, ky ligj do të vendoset në rend dite me pjesëmarrjen e të 9 gjykatësve.
Ndryshe, në atmosferë tensionuese Kuvendi I Maqedonisë më 2018 miratoi Ligjin për Gjuhët. Me këtë ligj parashihet që në të gjitha organet shtetërore, sikurse institucione qendrore, ndërmarrje publike, agjenci, drejtori, institucione e organizata, komisione dhe persona juridik që kryejnë autorizime publike, gjuhë zyrtare krahas Gjuhës Maqedone dhe alfabetit të saj, të jetë edhe Gjuha Shqipe. /tvklan.mk/
