Forcat ukrainase janë të bindura se kanë thyer vijën më të vështirë të mbrojtjes ruse në jug të vendit dhe tani do të mund të përparojnë më shpejt, tha një nga komandantët ukrainas, sipas mediave britanike, njofton AMI.
Ukraina nisi një kundërofensivë të paralajmëruar prej kohësh në front në qershor, por linjat mbrojtëse ruse të përgatitura mirë, të përforcuara me fusha të minuara, kanë ngadalësuar përparimin e tyre në jug drejt Detit Azov, përcjell KlanM.
Forcat ukrainase njoftuan tre ditë më parë se kishin ngritur flamurin kombëtar në fshatin Robotyn, në rajonin jugor të Zaporozhye, rreth 10 kilometra në jug të qytetit të Orihiva, në vijën e frontit.
“Nuk ndalemi këtu”, tha komandanti që udhëhiqte ushtarët në Robotin dhe që përdor emrin ushtarak “Combat”.
“Tjetër e kemi (qytetin) Berdyansk, dhe më pas edhe më shumë. Unë menjëherë i njoftova luftëtarët e mi: objektivi ynë nuk është Robotin, objektivi ynë është Deti Azov”, tha komandanti “Combat”.
Robotin është rreth 100 kilometra nga Berdyansk, një port në bregun e detit Azov dhe 85 kilometra nga qyteti strategjik i Melitopol. Të dy qytetet janë pushtuar nga forcat ruse që nga pushtimi gjithëpërfshirës rus i Ukrainës më 24 shkurt të vitit të kaluar.
Moska nuk ka konfirmuar se Ukraina ka avancuar në Robotin, përcjell KlanM.
Një zyrtar amerikan tha javën e kaluar se dukej se forcat ukrainase nuk do të ishin në gjendje të arrinin në Melitopol në kundërsulmin e tyre, që synonte të ndërpresë forcat ruse në jug.
Duke mbrojtur strategjinë e Ukrainës në kundërofensivë, presidenti Volodymyr Zelensky hodhi poshtë komentet se forcat ukrainase nuk janë vendosur mirë dhe përsëriti besimin e tij se Kievi do të rimarrë të gjithë territorin e pushtuar nga Moska.
“Kaluam rrugët kryesore që ishin të minuara dhe po arrijmë në ato vija ku mund të shkojmë përpara. Jam i sigurt se nga këtu do të shkojmë më shpejt”, tha komandanti “Combat”.
Ai shtoi se ushtarët ukrainas tani kanë hyrë në territore ku ka vetëm “grupe logjistike ruse” dhe ku ai e bëri të qartë se nuk pret që mbrojtja ruse të jetë e vështirë për t’u depërtuar.
“Ne po ecim përpara në çlirimin e të gjitha territoreve tona”, tha ai./KlanMacedonia
