Sonte në emisionin Klan Debat me Lubisha Nikolovskin, Andrej Petrov nga LSDM-ja e pranoi disfatën e partisë së tij dhe tha se duhet nxjerrë mësim nga rezultati zgjedhor.
“Në krahasim me zgjedhjet e kaluara kemi rreth 140 mijë vota më pak. Mesazhi i qytetarëve është i qartë për LSDM-në. Ne duhet të luftojmë për çdo votë në këtë raund të dytë, por një gjë është e sigurt që duhet të përgatitemi për kundërshtim dhe të mësojmë nga gabimet tona. Një pjesë e votave shkuan për partitë e tjera, një pjesë e qytetarëve qëndruan në shtëpi. Vullneti i qytetarëve ishte i madh në rrethin e parë, edhe pse në raundin e dytë zgjedhor nisim nga e para”, tha Petrov.
Sipas Igor Janushev nga VMRO-DPMNE, rezultatet nuk ishin befasuese.
“Njoftojmë se VMRO-DPMNE do të jetë fitues absolut i zgjedhjeve të dyfishta dhe ajo që ndodhi dje vërtetoi të gjitha tezat tona. As sondazhet më optimiste nuk parashikuan një fitore kaq bindëse, por askush nuk përmendi një diferencë prej 180.000 votash, pas këtyre 5 viteve të presidencës së Pendarovskit”, thotë Janushev.
Nikolla Memov nga ZNAM e Maksim Dimitrievskit tha se janë të kënaqur me rezultatet e zgjedhjeve.
“Ne presim që fluksi i votave të rritet ndjeshëm në rrethin e dytë zgjedhor, të ketë së paku 10 deputetë. Na befasoi paksa numri pozitiv i votave për Siljanovska Davkovën. Votat për Davkovën janë më shumë vota partiake se sa vota për të. Ne kemi thënë gjatë gjithë kohës që sondazhet krijojnë opinionin publik, por ne jemi një parti e vogël dhe kemi një rezultat të shkëlqyer. Presim rritje të votave për 30% dhe rënie drastike të LSDM-së”, tha Memov.
Lulzim Farizi, analist politik, beson se për herë të parë në histori ekzistojnë dy kampe të partive shqiptare.
“Shqiptarët mund të marrin maksimumi 30 deri në 32 deputetë. Teza se shqiptarët mund të shantazhojnë partitë politike maqedonase bie në tokë. Pres rreth 120 mijë vota për frontin europian në raundin e dytë zgjedhor. Mendoj se opozita shqiptare mund të marrë më shumë vota në raundin e dytë zgjedhor”, tha Farizi. /TvKlan.mk
