Komiteti Olimpik Ndërkombëtar (IOC) i ka kërkuar Ukrainës që të heqë dorë nga kërcënimet për bojkotimin e “Paris 2024” nëse atletët rusë dhe bjellorusë konkurrojnë aty. Presidenti i IOC, Thomas Bach, i tha Komitetit Olimpik të Ukrainës se kërcënime të tilla janë “jashtëzakonisht për të ardhur keq”.
Ukraina shpreson të fitojë mbështetje ndërkombëtare për ndalimin e sportistëve rusë e bjellorusë në Olimpiadë, për shkak të pushtimit.
IOC ka thënë se do të “eksplorojë një shteg” për atletët rusë dhe bjellorusë që të konkurrojnë si neutralë.
Ministri i Sportit i Ukrainës, Vadym Guttsait, tha se vendi mund të bojkotonte Lojërat e Parisit bsahkë me disa vende të tjera europiane.
Ndërsa presidenti ukrainas Volodymyr Zelensky ka thënë se lejimi i sportistëve rusë për të konkurruar në Lojërat Olimpike të 2024 do të ishte të tregonte se “terrori është i pranueshëm”.
Në një letër që Bach i drejton Ukrainës, shkruan se kërcënimi me bojkot është “i parakohshëm”, sepse IOC nuk e ka diskutuar ende pjesëmarrjen e atletëve rusë dhe bjellorusë si neutralë në “terma konkrete”.
Bach akuzoi gjithashtu Ukrainën për “presion” ndaj federatave ndërkombëtare në përpjekje për të ndikuar publikisht në vendimmarrjen e tyre.
Ai shtoi se një bojkot do të ishte “shkelje e kartës olimpike” dhe shkon kundër themeleve dhe parimeve të lëvizjes olimpike. Në fillim të këtij muaji, Letonia, Lituania, Estonia dhe Polonia shprehën kundërshtimet e tyre ndaj përfshirjes së atletëve nga Rusia dhe Bjellorusia në Olimpiadë.
Kjo nismë u ndoq edhe nga komitetet olimpike të Danimarkës, Finlandës, Islandës e Norvegjisë.
