Operacioni i kërkim shpëtimit për mijëra punonjës që janë angazhuar në kërkim të të mbijetuarve në Turqi është i vështirë, jo vetëm për shkak të motit të ftohtë, por sepse sa më shumë kalon koha, aq më të vogla janë shpresat për të mbijetuar.
Megjithatë, teksa kjo e mërkurë shënon ditën e tretë, ekipet kanë mundur të shpëtojnë shumë njerëz, ashtu si edhe në rastin e trupave shqiptare, të cilët në mesditë arritën të nxirrnin të gjallë nga rrënojat një 5-vjeçar në Malatya të Turqisë. I mituri ishte në gjendje të mirë shëndetësore pavarësisht orëve të gjata nën rrënoja.
Lajmi u bë i ditur nga Ministria e Mbrojtjes, e cila po ashtu tha se deri më tani janë nxjerrë dhe 3 trupa të pajetë. Pjesëtarët e ekipit tonë shëndetësor kanë asistuar edhe në dhënien e ndihmës shëndetësore për dhjetëra persona të lënduar.
Ndërkohë, në Turqi ka mbërritur edhe kontingjenti i dytë i forcave shqiptare. Në total Shqipëria ka dërguar 73 trupa të shpëtim kërkimit dhe njësisë ushtarake të shëndetësisë./tvklan.al
