Grupi i shtatë shteteve më të industrializuara (G7) do të eksplorojë për mënyra se si të përdorë në të ardhmen të ardhurat nga asetet e ngrira ruse për të ndihmuar Ukrainën. Kështu thanë ministrat e Financave të grupit përmes një deklarate më 25 Maj, raporton Reuters.
G7 ngriu asete ruse në vlerë prej rreth 300 miliardë Dollarësh, pak pasi Moska nisi pushtimin e fqinjit të saj në Shkurt të vitit 2022.
“Ne po bëjmë përparim në bisedimet tona për të ardhurat e mundshme që mund të merren nga asetet e ngrira sovrane ruse me qëllim që nga to të përfitojë Ukraina”, u tha në draft-deklaratë.
Deklarata finale, që do të publikohet më vonë gjatë 25 Majit, mund të pësojë ndryshime të mëdha, tha një burim për agjencinë Reuters.
Ministrave të G7-ës do t’iu bashkohet edhe ministri ukrainas i Financave, Serhiy Marchenko, shteti i të cilit po përballet me një ofensivë të re ruse në veri dhe lindje të shtetit.
Ministrat e Financave dhe drejtuesit e bankave qendrore takohen në Stresa, në veri të Italisë, me qëllim të prezantimit të opsioneve për çështjen e financimit të Ukrainës, para se krerët e qeverive të G7-s të diskutojnë për këtë çështje në samitin që mbahet në mes të qershorit.
“Në bazë të sistemeve tona ligjore, asetet sovrane të Rusisë që janë nën juridiksionin tonë do të vazhdojnë të jenë të ngrira derisa Rusia të paguajë për dëmin që i ka shkaktuar Ukrainës”, thuhet në deklaratë.
