FBI-ja aktualisht është duke kryer bastisje në shtëpinë e ish-zëvendëspresidentit Mike Pence në Indiana, pasi ekipi i tij ligjor njoftoi Arkivin Kombëtar se në shtëpi iu gjetën 12 dokumente të klasifikuara, deklaroi për CNN një burim i njohur me situatën.
Pence momentalisht është në bregun perëndimor me familjen e tij pasi vajza e tij lindi, njofton zëdhënësi i tij. Avokati privat i Pence është në shtëpinë e Indianës ndërsa kërkimi është duke u zhvilluar, shtoi zëdhënësi.
FBI-ja gjithashtu pritet të bastisë zyrën e Pence në Uashington gjatë ditëve në vijim, deklaruan burimet për CNN.
Pence u thirr dje nga këshilltari special Xhek Smith, i cili po heton ish-presidentin Donald Trump dhe rolin e tij në trazirat e 6 janarit të vitit 2021.
Bastisja vjen pasi FBI-ja dhe Divizioni i sigurisë kombëtare i Departamentit të Drejtësisë së SHBA-së nisën një shqyrtim të dokumenteve dhe se si përfunduan në shtëpinë e Pence. Nuk është ende e qartë se me çfarë lidhen dokumentet apo niveli i tyre i ndjeshmërisë apo klasifikimit.
Ekipi i Pence, në bisedimet me Departamentin e Drejtësisë përpara bastisjes shprehu gatishmërinë për të bashkëpunuar plotësisht. Ekipi i tij nuk beson se ka dokumente të klasifikuara as në shtëpinë e as në zyrën e tij, sepse ata vetë kanë kryer atë që ata besojnë se është një kontroll i gjerë, tha burimi.
Pence ka pranuar më parë se “kanë bërë gabime” dhe ka marrë përgjegjësinë për dokumentet e klasifikuara që përfunduan në shtëpinë e tij dhe është zotuar të “bashkëpunojë plotësisht” me çdo hetim të FBI-së. Ai tha se dokumentet e gjetura u vendosën “menjëherë” në ruajtje dhe u njoftua Arkivi Kombëtar.
