Ministrja e Punëve të Jashtme dhe Diasporës e Kosovës, Donika Gërvalla, merr pjesë në takimin e 27 ministrave të Jashtëm të vendeve të BE-së me ministrat e Jashtëm të vendeve të Ballkanit Perëndimor, i cili po mbahet në Bruksel.
Takimi i nivelit të lartë mbahet në margjinat e mbledhjes së Këshillit për Politikë të Jashtme të BE-së, që kryesohet nga përfaqësuesi i lartë, Josep Borrell, ndërsa pritet të diskutohet bashkëpunimi mes vendeve të Ballkanit Perëndimor dhe BE-së në fushat e Politikës së Jashtme dhe të Sigurisë, posaçërisht në kontekstin e agresionit rus në Ukrainë.
Në ftesën për Gërvallën, Borrell ka theksuar se për BE-në, Ballkani Perëndimor është partneri më i afërt, me të cilin ndajnë lidhje të fuqishme politike, ekonomike, të sigurisë dhe gjeografike, dhe një vizion të përbashkët për të ardhmen.
Në takimin e ministrave të Jashtëm të BE-së dhe homologëve nga vendet e Ballkanit Perëndimorë, pritet të diskutohen edhe zhvillimet e fundit në rajon.
Ndërkaq në njoftimin e BE-së për të njëjtën ngjarje përmendet se temë e diskutimeve për Ballkanin Perëndimor është edhe dialogu Kosovë-Serbi. /klankosova
