REAGONA LISTA SERBE – LISTA PËR TË PERSEKUTUAR SERBËT
Një listë me emrat e sic e quan “organizatave kriminale serbe dhe drejtuesve të tyre”, e ka publikuar në Facebook deputeti i Lëvizjes Vetëvendosje Armend Muja i cili kërkon edhe arrestimin e tyre.
Në këtë listë përmendet Mbrojtja Civile, e cila sipas tij është formuar nga Goran Rakiq, Igor e Slavko Simiq, Millosh Perovic, Nenad Gjuriq dhe Stevan Paviceviq.
Ai gjithashtu ka përmendur vëllaun e presidentit Serb Vuciq si dhe djalin e tij Danilo.
I menjehershëm ka qenë reagimi i Listës Serbe e cila thotë se kjo është një listë “për të persekutuar serbët”.
“Urrejtja e Albin Kurtit për çdo gjë serb shkon deri aty sa publikon një listë të re për persekutimin e serbëve, ku përfshihen edhe vëllai dhe djali i presidentit Aleksandër Vuçiq, të cilët nuk kanë asnjë lidhje me protestat demokratike dhe paqësore të popullit serb në barrikadat. Kështu, përfaqësuesi i Vetëvendosjes së Albin Kurtit, Armend Muja, ka publikuar një listë tjetër për persekutimin e serbëve nga Kosova, të cilën Kurti dhe ministri i tij Sveçla me këmbëngulje përpiqen ta fshehin”.
Lista Serbe pretendon se me publikimin e kësaj liste nga Muja, po ua “rrezikon drejtpërdrejt” jetën serbëve të Kosovës.
“Kurtit nuk i mjaftoi kriminalizimi i Listës Serbe dhe lidershipit të saj pa asnjë provë, por shkoi një hap më tej dhe djali i presidentit Vuçiq, Danilo dhe vëllai i tij Andrej u bënë shënjestër e regjimit të Kurtit”.
Si zakonisht, Lista Srpska tentoi t’i përfshijë ndërkombëtarët në këtë çështje dhe u mundua që të arsyetojë vendosjen e barrikadave.
Përgatiti: Blerta Dalloshi Berisha
