Ministri i Shëndetësisë, Ilir Demiri, mori pjesë sot në panelin kushtuar Ditës së Sëmundjeve të Rralla organizuar nga Aleanca Kombëtare për Sëmundjet e Rralla.
Në prezantimin e tij, Demiri theksoi se në vitin 2009 buxheti për sëmundje të rralla ishte rreth 25 milionë denarë, ndërsa sot është 950 milionë denarë.
“Nëse bëjmë një krahasim matematikor, në vitin 2009 investimet e para në sëmundje të rralla ishin diku rreth 25 milionë denarë, sot janë 950 milionë denarë. A jemi të kënaqur? Nuk jemi të kënaqur me atë që është arritur, sepse objektivi i Ministrisë së Shëndetësisë do të jetë mbulimi i secilit pacient që ka nevojë për një ilaç nga kategoria e sëmundjeve të rralla”, tha Demiri.
Demiri theksoi se mbështet Strategjinë Kombëtare, e cila do të fillojë të zbatohet shpejt.
“E mbështes Strategjinë Kombëtare dhe jam krenar për angazhimin tuaj, ajo do të fillojë të zbatohet shpejt. Në sistemin “Termini im”, Programi, i krijuar për regjistrim dhe gjurmim, do të vazhdojë të përditësohet dhe të ketë një rregull. Të njëjtën gjë them edhe për sëmundjet e rralla me referencë të veçantë për kategorinë e të sëmurëve me fibrozë cistike dhe aty ka shumë progres. Është objektivi im këtë vit, me fondet e dhëna nga qeveria, të rrisim numrin e pacientëve që do të përfshihen në terapi, me synimin dhe qëllimin që çdo pacient me fibrozë cistike të marrë ilaçe kur të ketë nevojë. Të mos ketë listë pritjeje. Dhe shpresoj se do të ketë një progres të tillë”, tha Demiri.
Vitin e kaluar janë futur 6 ilaçe të reja për 16 pacientë, ndërsa këtë vit janë futur 4 ilaçe të reja. Procesi i përgatitjes së protokolleve për trajtimin e personave me sëmundje të rralla ka nisur dhe po vazhdon dhe së shpejti pritet finalizimi i një pjese të protokolleve.
Ministria e Shëndetësisë është gjithmonë e hapur, transparente dhe mbetet e përkushtuar në adresimin e nevojave të të gjithë pacientëve.
