Pritet të pranohet vetëm Kroacia. Shkak, emigracioni dhe korrupsioni
Kroacia pritet të jetë vendi më i ri anëtar i zonës “Shengen” të lëvizjes së lirë brenda Bashkimit Europian. Por kjo mundësi sërish nuk do t’u jepet Bullgarisë dhe Rumanisë edhe pse janë anëtarësuar 5 vite para Kroacisë në Bashkimin Europian.
Vendimin e marrin këtë të enjte, ministrat e Jashtëm të vendeve të unionit të mbledhur në Bruksel. Por kryediplomati i Vjenës paralajmëroi “veton” kundër dy vendeve, që sipas tij kanë probleme me emigracionin e paligjshëm.
“Po, sot do të votoj kundër zgjerimit të hapësirës Shengen në Rumani e Bullgari, pasi vetëm këtë vit nga këto vende kemi pasur 100 mijë kalime ilegale të kufirit drejt Austrisë”.
Parlamenti holandez miratoi në Tetor një rezolutë ku theksohej nevoja e një analize të hollësishme për funksionimin e rendit dhe ligjit dhe nivelin e luftimit të korrupsionit në Bullgari dhe Rumani.
Përpjekjet e Bullgarisë dhe Rumanisë për të hyrë në këtë zonë, janë bllokuar për më shumë se një dekadë, që kur Komisioni vlerësoi se ato janë të gatshme për anëtarësim.
