Ministri viziton efektivin e plagosur tek Trauma
Ministri i Brendshëm Taulant Balla ka vizituar mbrëmjen e sotme punonjësin e plagosur të forcave “Shqiponja”, i cili iu nënshtrua një ndërhyrjeje kirurgjikale e po mjekohet në Spitalin e Traumës.
Efektivi Edlir Alleshi u plagos me armë zjarri mbrëmjen e sotme, teksa ishte në krye të detyrës duke ushtruar kontrolle në zonën e Kinostudios, në Tiranë.
Ministri Balla tha pasi pa nga afër punonjësin e plagosur se rreziku për jetën ka kaluar, por po mbahet nën monitorimin e mjekëve.
“Një gjë është e sigurt se ky guxim i madh për të goditur me armë një punonjës policie, e për të mos iu bindur urdhrit të Policisë, do të marrë një goditje shumë të madhe nga Policia e Shtetit. Do të marrë përgjigjen më të fortë. Thirrja ime për personin, apo familjarë të tij, se dua ta ndaj me mediat se personi është identifikuar, është të dorëzohet menjëherë”, apeloi ministri i Brendshëm.
Strukturat e policisë së kryeqytetit janë vënë në ndjekje të autorit i identifikuar si Klered Bozhanaj, 42-vjeç. Për kapjen e tij janë vënë po ashtu në dispozicion 20 mijë euro (Lexo më shumë)./tvklan.al
