Kryetarja e Qytetit të Shkupit, Danela Arsovska, së bashku me kryetarin e Komunës së Gazi Babës, Boban Stefkovski dhe drejtorin e NP „Parqe dhe Gjelbërim”, Angele Sotirovski, inspektuan fillimin e ndërtimit të sheshit të ri të gjelbër dhe parkut në lagjen Çento në Komunën e Gazi Babës.
Kryetarja e Qytetit të Shkupit, Danela Arsovska theksoi se në përputhje me programin “Për Shkupin Modern”, ngritja e sipërfaqeve të reja të gjelbra dhe parqeve të reja është një nga prioritetet në punën e Qytetit të Shkupit, dhe qytetarët e kësaj pjese të komunës do të kenë për herë të parë një park modern dhe hapësira të reja të gjelbra.
-Në përputhje me programin “Për Shkupin Modern” dhe ngritjen e hapësirave të reja të gjelbra në territorin e qytetit të Shkupit, sot fillojmë me rregullimin e hortikulturës së hapësirës publike, sheshit të ri të gjelbër në rrugën “Juzhnomoravski Brigadi” në Çento, parkut të ri për mbi 20.000 banorë të kësaj pjese të komunës, i cili do të rregullohet në një sipërfaqe prej 5.000 metrash katrorë, theksoi Arsovska.
Drejtori i NP “Parqe dhe Gjelbërim”, Angele Sotirovski theksoi se me iniciativën e kryetares, ekipet e ndërmarrjes publike tashmë kanë filluar me pastrimin e plotë të terrenit.
-Ekipet e NP “Parqe dhe Gjelbërim” tashmë kanë filluar me pastrimin e plotë të terrenit, ndërsa në periudhën e ardhshme do të bëhet nivelimi i tokës si dhe mbushja e sipërfaqes me shtresë dheu cilësore, vendosja e sistemit të ujitjes dhe përgatitja e truallit për mbjelljen e pemëve, gjithashtu planifikohet edhe pasurimi i florës së hapësirës së gjelbër, thotë Sotirovski.
Kryetari i Komunës së Gazi Babës, Boban Stefkovski falënderoi kryetaren e Qytetit të Shkupit për përpjekjet që bën për projekte të reja në Komunën e Gazi Babës të cilat janë gjithmonë të mirëseardhura dhe në interes të qytetarëve, si dhe faktit që banorët e Çentos për herë të parë do të kenë një hapësirë të tillë të re të gjelbër.
– Falënderoj kryetaren e Qytetit të Shkupit, për përpjekjet e bëra nga Qyteti i Shkupit për projekte të reja në Komunën e Gazi Babës, bashkëpunimi me qytetin është gjithmonë i mirëseardhur dhe në interes të qytetarëve të komunës së Gazi Babës. Në vend të këtij lokacioni që më parë ishte i parregulluar dhe i mbushur plot me mbetje inerte dhe mbeturina, tani banorët e lagjes Çento me këtë projekt për herë të parë do të kenë një shesh të ri të gjelbër dhe një hapësirë të rregulluar për pushim, sport dhe rekreacion, theksoi Stefkovski.
